Трамп Ресейге қарсы санкцияларды қолданудан бас тартты

АҚШ президенті Дональд Трамп Ресей мен Иранға қарсы санкциялар туралы заңда көзделген бірқатар санкцияны, шектеу мен баж салығын қолданбау туралы шешім қабылдады, деп жазады Kursiv.media.

«Мен осымен Грэмнің заңында көзделген осындай санкцияларды, шектеулер мен міндеттемелерді қолданудан бас тартамын. Мұндай ерекшелік жасау қазіргі уақытта АҚШ-тың ұлттық мүдделеріне сай келетінін растайтын құжатты Конгреске ұсындым», – делінген құжатта.

Трамп сондай-ақ Грэм заңында немесе осы жарлықта көзделген кез келген баж салығын қолданудан босататынын мәлімдеді.

Линдси Грэм заңына сәйкес, Ресейдің мұнайы мен газын көп сатып алатын елдерге 2026 жылғы 18 қазаннан бастап 100%-ға дейін қосымша баж салығын енгізу жоспарланған. Алайда Дональд Трамп әзірге бұл шараны қолданбау туралы шешім қабылдады.

Сонымен бірге АҚШ сауда өкіліне Ресей мұнайын сатып алу мен санкцияларды айналып өту әрекеттерін бақылап, президентке тұрақты түрде есеп беру тапсырылды.

Заң жобасын 2025 жылғы сәуірде сенаторлар Линдси Грэм мен Ричард Блументаль ұсынған. Алғашқы нұсқада баж салығының мөлшері 500%-ға дейін жетуі мүмкін еді. Алайда Ақ үймен келіссөздерден кейін ол 100%-ға дейін төмендетілді. Трамп заңға 2026 жылғы 18 қыркүйекте қол қойды.

Құжатта Ресейдің жоғары лауазымды тұлғаларына, банктері мен компанияларына, сондай-ақ «көлеңкелі флот» кемелеріне қарсы санкциялар енгізу қарастырылған. Бұдан бөлек, инвестициялар мен қаржылық операцияларға және Ресей уранының импортына шектеулер қою көзделген еді.

Тағы да оқыңыз: Трамп Ақ үйдің баспасөз хатшысын бес күннен кейін қызметінен босатты