ҚФФ «Ақтөбе» мен «Ордабасы» клубтарына айыппұл салды

Қазақстан футбол федерациясы (ҚФФ) «Ақтөбе» мен «Ордабасы» клубтарын Премьер-лиганың 23-туры аясындағы матчта жіберілген заңбұзушылықтар үшін жауапқа тартты, деп жазады Kursiv.Media.

ҚФФ-ның бақылау, тәртіптік және этика комитеті бұл шешімді 20 қазанда қабылдады.

«Ақтөбе» не үшін жазаланды?

«Ақтөбе» клубына матчты тиісті деңгейде ұйымдастырмағаны және қауіпсіздік талаптарын сақтамағаны үшін 300 АЕК мөлшерінде айыппұл салынды. Атап айтқанда, клуб директоры Б. Дүзелбаев төрешілердің киім ауыстыратын бөлмесіне рұқсатсыз кірген. Комитет мұны матчтың ресми тұлғаларының қауіпсіздігін қамтамасыз ете алмау деп бағалады.

Тағы 200 АЕК айыппұл жанкүйерлердің тәртіпсіздігі үшін салынды. ҚФФ мәліметінше, олар матч кезінде балағат сөздер айтып, қарсылас командаға тіл тигізген.

Ал бас бапкер Игорь Черевченкоға мәлімдемелері үшін 50 АЕК айыппұл салынды. Алайда федерация нақты қандай сөздер үшін жаза қолданылғанын хабарламады.

«Ордабасыға» да айыппұл салынды

Шымкенттік клуб матчтың басталуын үш минутқа кешіктіргені үшін 60 АЕК айыппұл төлеуге міндеттелді. Бұған команданың киім ауыстыратын бөлмеден алаңға кеш шығуы себеп болған.

Барлық айыппұлды 2026 жылғы 20 қарашаны қоса алғанға дейін төлеу қажет.

ҚФФ клубтар матчты ұйымдастыруға, қауіпсіздікке, өз өкілдері мен жанкүйерлерінің тәртібіне жауапты екенін атап өтті. Федерация жарыс регламенті мен кәсіби этика нормаларын сақтау міндетті екенін еске салды.

Бұған дейін «Ақтөбе» – «Ордабасы» матчында қорлайтын жазулары бар плакат пен Өзбекстан туын көрсеткен кәмелетке толмаған жанкүйер қыздардың ата-аналары әкімшілік жауапкершілікке тартылғанын жазған едік. Кейін «Ақтөбе» қыздардың айыппұлын өтейтінін хабарлап, ұлтаралық араздық жол бермеу керектігін мәлімдеген. Сондай-ақ жанкүйерлерді спорттық этиканы сақтауға шақырған.