Қазақстанда Kia Sportage пен Soluto көліктеріне сұраныс артты
Елде тоғыз ай ішінде 46,5 мың автокөлік техникасы өндірілді. Өндіріс көлемі былтырғы осы кезеңмен салыстырғанда 34,2%-ға өсті. Қаңтар-қыркүйекте Қазақстанда ең көп өндірілген жеңіл көлік – Chevrolet Cobalt. Бұл туралы Қазақстанның Автокөлік Одағы мәлімдеді.
Қыркүйекте автокөлік өндірісі 55%-дан астам өсті
Қыркүйекте қазақстандық кәсіпорындар 20 215 бірлік автокөлік техникасын шығарды. Бұл 2025 жылғы қыркүйекпен салыстырғанда 55,2%-ға, ал биылғы тамызбен салыстырғанда 32,4%-ға көп.
ҚАО президенті Анар Мақашеваның айтуынша, отандық автоөнеркәсіп жоғары даму қарқынын сақтап отыр. Оның сөзінше, өндірушілер Қазақстандағы өндірісін кеңейтіп, жаңа жобаларды іске асыруға дайындалып жатыр.
«Тоғыз ай қорытындысы бойынша Қазақстандағы автоөнеркәсіп жоғары даму қарқынын сақтап тұр. Сала инвестицияға қолайлы, өндірушілер Қазақстандағы орнын нығайтып, жаңа жобаларын жүзеге асырып жатыр», – деді Анар Мақашева.
Chevrolet Cobalt пен Hyundai Tucson көш бастап тұр
ҚАО дерегіне сәйкес, қаңтар-қыркүйек айларында ең көп өндірілген модельдер қатарында Chevrolet Cobalt көш бастады. Қазақстанда осы кезеңде 27 659 Cobalt шығарылған.
Одан кейінгі орындарда Hyundai Tucson (10 522), Kia Sportage (7 139), Hyundai Mufasa (6 743) және Changan CS35 Max (5 296) тұр.
Брендтер бойынша Chevrolet 29 555 автокөлікпен бірінші орында. Hyundai – 27 275, Kia – 17 712, Changan – 15 148 және Chery 12 593 автокөлік шығарған.
Қай кәсіпорындар көбірек көлік шығарды
Тоғыз айда Қостанайдағы Allur зауыты 56 130 бірлік техника өндірді. Алматыдағы Astana Motors Manufacturing Kazakhstan кәсіпорны Changan, Chery және Haval маркалы 40 245 автокөлік құрастырды.
Ал Hyundai Trans Kazakhstan 27 305, Kia Qazaqstan 13 782 автокөлік шығарған.
ҚАО мәліметінше, Қазақстанда өндірісті кеңейту және жергілікті автокомпоненттер үлесін арттыру бағытындағы жобалар да жалғасып жатыр. Олардың қатарында Алматыда OMODA және JAECOO маркалы автокөліктер өндірісін іске қосу, сондай-ақ Қостанайда Li Auto көліктерін өндіру жобалары бар.
Chevrolet көшбасшылығын сақтап қалды
Қыркүйек айындағы брендтер рейтингінде Chevrolet бірінші орынға жайғасты. Ал Kia үшінші орынға көтерілді. Changan көліктерінің сатылымы екі еседен астам өсті.
Қыркүйекте ең көп сатылған 10 бренд:
- Chevrolet – 3 067 көлік (+4,2%);
- Hyundai – 2 932 (-29,5%);
- Kia – 2 584 (+29,1%);
- Changan – 1 501 (+127,1%);
- Chery – 1 179 (+28,3%);
- Haval – 1 171 (+88,9%);
- Toyota – 1 150 (+0,4%);
- Jetour – 900 (-1,3%);
- Geely – 636 (-26,4%);
- BYD – 560 (+32,4%).
Kia Sportage Hyundai Tucson-нан көп сатылды
Жекелеген модельдер рейтингінде Chevrolet Cobalt бұрынғысынша бірінші орында тұр. Дегенмен үздік бестікте өзгеріс бар: Kia Sportage екінші орынға көтеріліп, Hyundai Tucson үшінші орынға түсті. Ал қолжетімді седан Kia Soluto алғаш рет үздік бестікке енді.
Қыркүйекте ең көп сатылған 10 модель:
- Chevrolet Cobalt – 2 906 көлік;
- Kia Sportage – 1 187;
- Hyundai Tucson – 985;
- Hyundai Mufasa – 899;
- Kia Soluto – 577;
- Toyota Camry – 532;
- Hyundai Elantra – 508;
- Haval Jolion – 479;
- Changan CS35 MAX – 458;
- Changan CS75 Plus – 429.
Тағы да оқыңыз: Cobalt, Tucson, Sportage: Қазақстанда қай көліктер көп шығарылды
