Талап күшейді: 2026 жылдан бастап фискалдық чекте не өзгереді?
Қазақстанда сауда-саттық пен қызмет көрсету саласында фискалдық чек беру талаптары жаңарды, деп хабарлайды Kursiv.Media.
Маңғыстау облысы бойынша Мемлекеттік кірістер департаменті төлемнің қалай жасалғанына (қолма-қол ақша, банк картасы немесе QR-код) қарамастан, кәсіпкерлер тұтынушыға чек ұсынуға міндетті екенін ескертеді.
2026 жылдан бастап чекте не жазылуы тиіс?
ҚР Қаржы министрінің бұйрығына сәйкес, БКМ чегінде мынадай міндетті реквизиттер көрсетілуі керек:
- Кәсіпкер мәліметтері: Салық төлеушінің атауы, ЖСН/БСН, кассаның орналасқан мекенжайы, зауыттық және тіркеу нөмірлері;
- Сатып алу мазмұны: Тауар немесе қызметтің атауы, саны, өлшем бірлігі, бір данасының бағасы және жалпы сомасы;
- Басты жаңалық: Тауардың атауы мен коды Ұлттық тауарлар каталогына (ҰТК) сәйкес міндетті түрде жазылуы тиіс. Сондай-ақ таңбаланатын өнімдер үшін сәйкестендіру құралдарының мәліметтері де қоса көрсетіледі;
- Төлем деректері: Төлем жасалған күн мен уақыт, чектің реттік нөмірі, фискалдық белгі, сондай-ақ ҚҚС ставкасы мен сомасы (егер сатушы ҚҚС төлеушісі болса);
- Оператор ақпараты: Фискалдық деректер операторының (ФДО) атауы және тексеруге арналған штрих-код/QR-код.
Чек бермегендерге қандай айыппұл салынады?
Фискалдық чек бермеу немесе чекте тиісті реквизиттердің болмауы заң бұзушылық болып табылады: Алғашқы ереже бұзушылық орын алса, ек ескерту жасалады. Бір жыл ішінде қайталанса, бизнес субъектісінің санатына байланысты 20-дан 40 АЕК-ке дейін айыппұл арқалайды (шамамен 86 500 – 173 000 теңге аралығы).
Тұтынушыларға кеңес:
- Чекті әрдайым талап етіңіз: Әрбір төлемнен кейін чек сұрауды ұмытпаңыз.
- Реквизиттерді тексеріңіз: Чекте QR-код пен өнімнің ҰТК бойынша атауы толық көрсетілгеніне көз жеткізіңіз.
- Заң бұзушылықты хабарлаңыз: Егер сізге чек беруден бас тартса, e-Otinish сервисі арқылы немесе Мемлекеттік кірістер органдарына шағымдануға болады.
Фискалдық чек – сатушының жауапкершілігін, ал тұтынушының құқығын қорғайтын негізгі заңды құжат.
