Алатау қаласында инвесторлардың құқығы Конституциямен қорғалатын болады

Алатау қаласында инвесторлар мен кәсіпкерлер үшін қолайлы орта қалыптастыру мақсатында ағылшын құқығы моделіне негізделген Инвестициялық сот құрылады. Үкімет 2027 жылғы қаңтардың соңына дейін Құрылтай қарауына тиісті конституциялық заң жобасын енгізуі тиіс. Бұл туралы мемлекет басшысы Қасым-Жомарт Тоқаев Қазақстан халқына жолдауында айтты, деп хабарлайды KursivMedia.

Алатау қаласының құрылысы инвестициялар мен кәсіпкерлік үшін қолайлы орта болуға арналғаны және мұның орасан зор маңызы бар екені көпшілікке айқын болды.

Кез келген халықаралық юрисдикцияның ұзақ мерзімді тартымдылығының басты шарты – тиімді сот төрелігі. Сондықтан Алатауда сот төрелігін жүзеге асырудың жоғары сапасын қамтамасыз ететін сот жүйесі құрылуы тиіс.

Атап айтқанда, коммерциялық істерді ағылшынның жалпы құқық моделі бойынша Инвестициялық сот қарайтын болады. Ал арнайы құқықтық режимге қатысты барлық басқа мәселелер Азаматтық соттың құзыретіне кіреді.

«Үкімет 2027 жылғы қаңтардың соңына дейін Құрылтайдың қарауына «Алатау қаласының арнайы құқықтық режимі туралы» Конституциялық заңға тиісті түзетулер енгізуі қажет. Барлық салмақты әрі адал кәсіпкерлердің инвестициялық мүдделері ең күшті, сенімді құқықтық қорғаумен – Ата заңымыз Конституциямен кепілдендірілген.», – деді Президент.

Айта кетейік, бұған дейін Alatau City-де Алматы өңіріндегі ең биік ғимарат – Iconic Complex құрылысы басталғанын жазған едік.