Автокөлік аккумуляторын қысқа қалай дайындау керек

Алғашқы аяздарда көлік аккумуляторында ең алдымен бұрыннан бар ақаулар сыр беруі мүмкін. Сондықтан мамандар қыс басталмай тұрып аккумулятордың жай-күйін тексеруге кеңес береді. Бұл туралы КурсивАвто Autoreport.kz-ке сілтеме жасап хабарлайды.

Қазақстанның климаттық ерекшеліктерін ескерсек, аккумуляторды қысқа дайындап, тексерудің оңтайлы уақыты – қазан айының соңы мен қараша айының басы. Ең бастысы – тұрақты аяз басталғанға дейін диагностикадан өткізу. Егер қозғалтқыш бұрынғыдан баяу отала бастаса немесе аккумулятор қайта-қайта отырып қалса, тексеруді кейінге қалдырмаған жөн.

Бір қызығы, аккумулятор жаздың өзінде қуатын жоғалта бастауы мүмкін. Жоғары температура оның химиялық тұрғыдан ескіруін жеделдетеді. Алайда күн жылы кезде жүргізуші бұл мәселені байқамауы мүмкін. Қыста жағдай өзгереді. АҚШ автомобиль қауымдастығының (AAA) бағалауынша, ауа температурасы –18 градусқа дейін төмендегенде, аккумулятордың қозғалтқышты оталдыруға қолжетімді қуаты шамамен 60%-ға азаюы мүмкін.

«Таңертең баланы мектепке апару, одан кейін жұмысқа жету, кешке дүкенге соғу – қаладағы әдеттегі күнделікті бағыт. Бірақ әр сапар бірнеше минутпен ғана шектелсе, аккумулятор қозғалтқышты оталдыруға жұмсалған қуатты толық қалпына келтіріп үлгермеуі мүмкін. Қыста бұған әйнек пен орындықтарды жылыту, жарықтандыру және басқа да электр жабдықтары қосымша салмақ түсіреді. Соның салдарынан күн сайын пайдаланылатын көліктің өзінде аккумулятор біртіндеп қуатын жоғалтуы мүмкін», – деп түсіндіреді Bosch мамандары.

Тағы бір қауіп – аккумулятордың қатты отырып қалуы. Bosch деректеріне сәйкес, бұл оның пластиналарында сульфаттану процесін туғызып, аккумуляторды зақымдауы және қызмет ету мерзімін қысқартуы мүмкін. Дегенмен қуаты таусылған аккумуляторды бірден ауыстыру міндетті емес. Кей жағдайда оны дұрыс қуаттау жеткілікті.

Тағы бір маңызды жайт – аккумуляторды қуаттаған бойда тексеруге болмайды. Зарядтау құрылғысын ажыратқаннан кейін кернеу уақытша жоғары болып, аккумулятор толық жарамды деген жалған әсер тудыруы мүмкін. Bosch мамандары стандартты тексеру алдында аккумуляторды кемінде төрт сағат тынықтыруға кеңес береді. Бұл оның нақты жағдайын дәлірек бағалауға және уақытша жоғары көрсеткішті аккумулятордың шынайы күйімен шатастырмауға мүмкіндік береді.

Тағы да оқыңыз: Жаңбыр, тұман, көктайғақ: күзде көлік жүргізгенде нені ескеру керек