Алматыдағы «Твардовский дом» панажайының иесін өлтірді деген күдікті ұсталды

Алматы облысында қаңғыбас жануарларға арналған Dog House («Твардовский дом») панасының иесін өлтірді деген күдікті ұсталды. Ол қамауға алынды, деп жазады Kursiv.Media.

Алматы облыстық полиция департаментінің мәліметінше, күдікті жедел-іздестіру шаралары барысында анықталып, қолға түскен.

«Жедел-іздестіру іс-шаралары барысында күдікті анықталып, ұсталды. Қазіргі уақытта ол қамауда. Тергеу аясында ұсталған адамның кісі өлтіру қылмысына қатысы бар-жоғы тексеріліп, қылмыстық істің мән-жайын толық, жан-жақты және объективті анықтау үшін қажетті шаралар жүргізіліп жатыр», – деп хабарлады ведомствоның баспасөз қызметі.

Полиция тергеу құпиясына байланысты күдіктінің жеке басы мен оны ұстауға қатысты өзге де мәліметтерді жарияламады. Дегенмен істі полиция департаменті басшылығы ерекше бақылауға алғанын атап өтті.

9 қазанда Алматы облысында «Dog House – Твардовский дом» жануарларға арналған жеке панажайының негізін қалаушы Владимир Тепляковты өлтіріп кеткенін жазған едік.

Марқұм Тепляков 2015 жылы «Dog House – Твардовский дом» панаханасын ашқан. Бұл орынды қайтыс болған ұлының құрметіне атаған. Бірақ панажай иесі қайтыс болғаннан кейін 90-ға жуық ит қараусыз қалды.