Ауа райының нашарлауына байланысты 10 облыста ескерту жасалды
Қазақстанның шығыс, солтүстік және батыс өңірлерінде жауын-шашын түсіп, көктайғақ болады деп күтілуде, деп хабарлайды Kursiv.Media.
«ҚазАвтоЖол» ұлттық компаниясы қолайсыз ауа райы болжанып отырған Қазақстанның 10 өңірінің жүргізушілеріне үндеу жасап, республикалық тас жолдарда аса сақ болуды сұрады.
Синоптиктердің болжамынша, Абай, Ақмола, Ақтөбе, Павлодар, Қарағанды, Қызылорда, Маңғыстау, Ұлытау, Солтүстік Қазақстан және Шығыс Қазақстан облыстарында түнде және таңертең қар аралас жаңбыр жауып, көктайғақ болады.
«Жүргізушілерден аса мұқият болуды, жылдамдық режимі мен арақашықтықты қатаң сақтауды, сапар бағытын алдын ала жоспарлап, мүмкіндігінше қажетсіз алыс жолға шықпауды сұраймыз. Әсіресе көліктің жағдайына мән беріңіздер – жазғы дөңгелекпен жүру көліктің сырғанау және жол көлік оқиғасына ұшырау қаупін бірнеше есе арттырады», – деп ескертті «ҚазАвтоЖолда».
Ведомство мәліметінше, 8–9 қараша күндері Ақмола облысында тәртіп сақшылары жазғы дөңгелекпен жүрген 744-тен астам көлікті кері қайтарған. Ауа райының нашарлауына байланысты бұл жүргізушілерге республикалық маңызы бар тас жолдармен әрі қарай жүруге рұқсат етілмеді.
