Вице-президент, құрылтай төрағасы: пантеонда жерленетін тұлғалар тізімі толықты

Үкімет Астанадағы ұлттық пантеонда жерлеу тәртібіне өзгеріс енгізді. Енді пантеонда жерленуге құқылы тұлғалар қатарына вице-президент, құрылтай төрағасы және Қазақстан халық кеңесінің төрағасы сияқты жаңа мемлекеттік лауазым иелері де қосылды.

Қандай өзгерістер енгізілді

Үкіметтің 2026 жылғы 4 қарашадағы №981 қаулысымен Ұлттық пантеон туралы ережеге түзетулер енгізілді. Жаңа ережеге сәйкес, Ұлттық пантеонда жерлену құқығы берілетін мемлекеттік қызметшілер мен саяси тұлғалар қатарына мыналар қосылды:

• Қазақстанның вице-президенттері;
• премьер-министрлер мен олардың орынбасарлары;
• Құрылтай төрағалары мен олардың орынбасарлары;
• Қазақстан халық кеңесінің төрағалары мен олардың орынбасарлары;
• Парламент палаталарының төрағалары мен олардың орынбасарлары;
• мемлекеттік хатшылар мен мемлекеттік кеңесшілер;
• Президент әкімшілігінің басшылары;
• Конституциялық кеңестің, Конституциялық соттың, Жоғарғы соттың және Ұлттық банктің төрағалары;
• Қауіпсіздік кеңесі төрағасының орынбасарлары.

Сонымен қатар, Ұлттық пантеонда жерленуге құқығы бар тұлғалар қатарында министрлер, президентке тікелей бағынатын мемлекеттік органдардың басшылары, Астана, облыстар мен республикалық маңызы бар қалалардың әкімдері де бар.

Пантеонда тағы кімдер жерленуі мүмкін

Мемлекеттік қызметшілерден бөлек, қолданыстағы ережеге сәйкес, ұлттық пантеонда Қазақстан президенттері мен олардың отбасы мүшелерін де жерлеуге болады. Сондай-ақ «Халық қаһарманы», «Қазақстанның Еңбек Ері» атақтарының иегерлері, Кеңес Одағының Батырлары мен Социалистік Еңбек Ерлері де осы тізімге кіреді.

Бұған қоса, белгілі бір мемлекеттік ордендермен марапатталған және «Қазақстанның ғарышкер-ұшқышы» құрметті атағын алған азаматтар да пантеонда жерлене алады.

Пантеонда жерленген адамдар туралы мәліметтер арнайы тіркеу кітабына енгізіледі. Онда қайтыс болған (қаза тапқан) азаматтар туралы мынадай ақпарат көрсетіледі:

• тегі, аты және әкесінің аты (бар болса);
• марқұмның Пантеонға жеткізілген және жерленген күні;
• өмірбаяны;
• Қазақстан Республикасына сіңірген еңбегі;
• өзге де мәліметтер.

Қаулы 2026 жылғы 17 қарашадан бастап күшіне енеді.