Алматыда су басқан «Алатау» метро станциясын қалай тазартып жатыр

Алматыда 10 қараша кешінен бері толассыз жауған жаңбырдан «Алатау» метро станциясының жерасты жаяу жүргіншілер өткелін су басты. Коммуналдық қызметкерлер су сору техникасын жұмылдырып, жиналған суды шығару және өткелді тазарту жұмыстарын жүргізіп жатыр. Kursiv.Media нөсер салдарын жою барысымен барып танысып қайтты.

Оқиға орнынан түсірілген фотосуреттерде метро маңына арнайы техника жеткізіліп, коммуналдық қызметкерлердің су басудың салдарын жоюға кіріскені көрінеді. Жол бойында автобустар мен троллейбустар жүр, ал жұмысшылар су сору техникасының көмегімен жиналған суды шығарып жатыр.

Метроға кіреберісте де тазалық жұмыстары жүргізілуде. Қызметкерлер сыпырғыштар мен арнайы құралдарды пайдаланып, жаяу жүргіншілер өтетін аумақты тазалап жатыр.

Фотосуреттердің бірінде өткелдің ішкі бөлігінде коммуналдық қызметкерлердің жұмыс істеп жүргені байқалады. Еден ылғал, алайда түсірілім кезінде өткел арқылы адамдардың жүріп жатқаны да көрінеді.

Метро кіреберісінің маңына су өтуінің алдын алу үшін құм салынған қаптар қойылған. Ал сыртта арнайы көліктер мен су соруға арналған құбырлар орналастырылған.

Алматы әкімдігінің мәліметінше, 11 қараша сағат 10:00-дегі жағдай бойынша қалада 23 мм, Медеу ауданында 26 мм, Каменск үстіртінде 36 мм жауын-шашын түскен.

Нөсердің салдарын жою үшін қала бойынша 85 жедел бригада кезекшілікке шыққан. Жұмысқа 415 техника, 97 мотопомпа жұмылдырылып, 2 950 құм салынған қап дайындалған.

Синоптиктер 11 қарашада жаңбырдың күні бойы үзіліспен жауатынын болжап отыр. Қосымша 10 мм-ге дейін жауын-шашын түсуі мүмкін. Ал 12 қарашада жауын-шашынсыз ауа райы күтіледі.