Алматыда антитеррористік оқу-жаттығу өтеді

12 қарашада Алматының Жетісу ауданында антитеррористік оқу-жаттығу ұйымдастырылады. Ол таңғы сағат 08:00-ден 15:00-ге дейін Бурундайская көшесінің бойындағы теміржол жолдарында өтеді. Бұл туралы қалалық Полиция департаментінің баспасөз қызметі хабарлады.

Іс-шараның мақсаты – көлік инфрақұрылымы нысандарында болуы мүмкін террористік әрекеттердің алдын алу және мұндай жағдайларға тосқауыл қою тетіктерін жетілдіру. Оқу-жаттығу кезінде жолаушылар мен жүк пойыздарының қозғалысын шектеу жоспарланбаған.

Полиция департаменті тұрғындарды қауіпсіздік шараларын сақтауға және оқу-жаттығуға қатысатын мемлекеттік орган қызметкерлерінің заңды талаптарын орындауға шақырды.

«Қауіпсіздік шараларын сақтап, мемлекеттік органдардың жұмылдырылған қызметкерлерінің заңды талаптарын орындауды сұраймыз. Сондай-ақ ақпаратты ресми дереккөздерден алып, жалған мәлімет таратпау қажет», – деп жазылған ведомство хабарламасында.

Полиция өкілдері Әкімшілік құқық бұзушылық туралы кодекстің 443-бабына сәйкес, қоғамдық тәртіпті қамтамасыз етуге қатысатын адамның заңды талабына бағынбағандар әкімшілік жауапкершілікке тартылатынын еске салды.