Петропавлда 5,9 млрд теңгеге жаңа жедел жәрдем стансасы салынады

Петропавлда жаңа медициналық жедел жәрдем стансасын салуға Инфрақұрылымды дамыту қорынан 5,9 млрд теңге бөлінді. Оның ішінде 800 млн теңгеге медициналық жабдықтар сатып алу көзделген, деп хабарлайды Kursiv.Мedia үкіметтің баспасөз қызметіне сілтеме жасап.

Қазіргі уақытта облыстық жедел медициналық жәрдем стансасы қаладағы 22 бригаданың және ауылдық жерлердегі 14 бөлімшенің жұмысын үйлестіреді. Олар 510 мыңнан астам тұрғынға медициналық қызмет көрсетеді. Әр бригада тәулігіне орта есеппен 16 шақыртуға шығады. Жыл сайынғы шақыртулар саны 100 мыңнан асады.

Құрылыс қашан аяқталады

Жалпы аумағы 1,5 гектар болатын кешеннің құрамына төрт қабатты негізгі ғимарат, цифрлық диспетчер қызметі, симуляциялық орталық, 20 санитариялық автокөлікке арналған жылы гараж, көлік жуу орны мен жөндеу шеберханасы кіреді. Құрылыс жұмыстарын 2027 жылғы желтоқсанда аяқтау жоспарланған.

Жаңа нысан қандай жабдықтармен қамтылады?

Жаңа ғимаратта арнайы техниканы, медициналық құралдар мен дәрілік заттарды да сақтауға арналған үй-жайлар қарастырылатын болады. Стансаны «суық тізбекті» ұстап тұруға арналған жабдықтармен жарақтандыруға ерекше назар аударылмақ, бұл препараттарды сақтауға қажетті температураны қамтамасыз етуге және олардың сапасы мен тиімділігін сақтауға мүмкіндік береді.

Жаңа стансаның артықшылығы неде

Жаңа жедел жәрдем стансасының құрылысын салу шұғыл шақыртуларға бару уақытын қысқартып, өңір тұрғындарына медициналық қызмет көрсету жеделдігін арттыра түспек. Заманауи цифрлық диспетчерлік бөлме қоңырауларды өңдеуді жеделдетуге, олардың басымдығын дәл айқындауға және медициналық бригадаларды жедел бағыттауға мүмкіндік береді. Жаңа ғимаратта қызметкерлер үшін қолайлы жағдайлар, медицина қызметкерлерінің біліктілігін арттыру үшін симуляциялық орталық және санитарлық көліктің сенімді жұмыс істеуін қамтамасыз ету үшін жылы гараж қарастырылған.

Айта кетейік, биыл Қазақстанда 50-ге жуық денсаулық сақтау нысанын салуға 108 млрд теңге бөлінген.

Өңірлерде ірі нысандар қарқынды салынуда, олардың ішінде Қызылорда мен Өскемендегі 300 төсектік көпсалалы ауруханалар, Атырау облысындағы емханалар, сондай-ақ Солтүстік Қазақстан облысы Бескөл ауылындағы және Талдықорғандағы амбулаториялық кешендер бар.

Ал Өскемен қаласында заманауи Гематология орталығы пайдалануға берілді.

Бұған дейін Үкімет Ақмола облысында су тасқынының алдын алу және халықтың қауіпсіздігін қамтамасыз ету жұмыстарына 5,5 млрд теңге бөлген.