Mercedes-Benz Германиядағы зауыттарын жабуы мүмкін

Штутгарт қаласында орналасқан Mercedes-Benz автоконцерні Германиядағы зауыттарына жаңа инвестиция салуды уақытша тоқтатады. Бұған өндіріс шығындарының жоғары болуы және кәсіподақтармен келіссөздердің тығырыққа тірелуі себеп. Сонымен қатар компания зауыттарды жабу мүмкіндігін де байыпты қарастыра бастады.
Bild басылымының хабарлауынша, компанияның персонал мәселелеріне жауапты басқарма мүшесі Бритта Зегер мұндай шешімге өндіріс шығындарының өсуі себеп болғанын түсіндірді. Оның айтуынша, концерн Германиядағы қай өндіріс орындары ұзақ мерзімде экономикалық тұрғыдан тиімді жұмыс істей алатынын бағалауы керек. Mercedes-Benz зауыттарды жабудан мүмкіндігінше қашқысы келгенімен, енді бұл нұсқаны да байыпты қарастыруға мәжбүр.
Компания басшылығы мен қызметкерлер өкілдері арасындағы келіссөздер әзірге нәтижесіз аяқталған. Зегердің сөзінше, жақын арада ортақ мәмілеге келу мүмкіндігі байқалмайды. Бұл туралы ол компания ішіндегі сұхбатында айтқан.
Тараптар өндіріс шығындарын едәуір қысқартып, сонымен бірге қызметкерлер үшін әлеуметтік тұрғыдан қолайлы болатын шаралар пакетін әзірлеуді көздеп отыр.
Даудың негізгі себебі – Германиядағы өндіріс шығындарының жоғары болуы. Mercedes-Benz дерегінше, неміс зауыттарындағы бір сағаттық еңбек құны кей жағдайда Шығыс Еуропадағы кәсіпорындармен салыстырғанда бес есе қымбат. Сондықтан компания басшылығы еңбек жағдайларына қатысты бірқатар жеңілдік жасауды талап етіп отыр. Атап айтқанда, қазіргі жалақы деңгейін сақтай отырып, жұмыс уақытын ұзарту мәселесі талқылануда.