28 тамыз бен 8 қыркүйек аралығында Парижде өтетін Паралимпиада ойындарында спорттың 9 түрінен 44 спортшы Қазақстан намысын қорғайды. 21 тамызда спортшыларды премьер-министр Олжас Бектенов қабылдап, мемлекеттік туды табыс етті.
Премьер-министр мемлекеттік туды ұлттық паралимпиада құрамасының екі ту ұстаушысы – Азия Паралимпиада ойындарының жүлдегері, Қазақстан чемпионатының он дүркін жеңімпазы Берік Ізмағанбетовке (отырып ойнайтын волейбол) және Қазақстан чемпионатының жеңімпазы Севда Алиеваға (пара оқ ату) табыстады.
Қазақстан атынан XVII жазғы Паралимпиада ойындарына спорттың 9 түрінен 44 спортшы қатысады. Жарыс 28 тамыз бен 8 қыркүйек аралығында Парижде өтеді.
Айта кетейік, 2021 жылы Токиода өткен Паралимпиада ойындарында Қазақстан 1 алтын (Давид Дегтярев), 3 күміс (Ануар Сариев, Теміржан Дәулет және Зарина Байбатина), 1 қола (Нұрдәулет Жұмағали) медаль иеленген. Бұл ойындарға ел атынан 7 спорт түрінен 26 спортшы қатысқан.
Еске сала кетейік, Париждегі Олимпиада ойындарынан жалғыз алтынды дзюдодан 60 келі салмақта сынға түскен Елдос Сметов жеңіп алды. Күміс медаль алғандар: гимнаст Нариман Курбанов, грек-рим күресінің өкілі Демеу Жадыраев (77 келі) және боксшы Нұрбек Оралбай (80 келі). Ал қола медаль қыздар арасындағы бокстан Назым Қызайбайға, нысана көздеуден аралас командалық жарыста Александра Ле мен Ислам Сәтпаев және дзюдошы Ғұсман Қырғызбаевқа (66 келі) бұйырды.
