Apple компаниясы бүктелетін iPhone Duo смартфонына сұраныс «ерекше жоғары» болғанын мәлімдеді. Жаңа модель сатылымға шыққаннан кейін бірнеше сағат ішінде компанияның ресми сайтындағы барлық данасы сатылып кеткен. Бұл туралы Financial Times хабарлады, деп жазады Kursiv.Media..
Компанияның мәліметінше, iPhone Duo смартфонына алдын ала тапсырыс беру кезеңінде-ақ сұраныс өте жоғары болған.
«Алғашқы жиналмалы iPhone-ымыз – iPhone Duo-ға алдын ала тапсырыс беру кезеңіндегі сұраныс біз күткеннен де жоғары болды. Біз бұл жаңа өнімді тұтынушыларымызға мүмкіндігінше тезірек жеткізу үшін бар күшімізді салып жатырмыз» делінген компанияның мәлімдемесінде.
Жиналмалы iPhone Duo қанша тұрады?
Нарықтық капитализациясы 5 трлн долларға жеткен Apple компаниясы жаңа смартфонға онлайн тапсырыс қабылдауды жалғастырады. Құрылғының бастапқы бағасы – 1 999 доллар.
iPhone Duo – Apple смартфондарының дизайнындағы соңғы жылдардағы ең үлкен өзгерістердің бірі. Алғашқы iPhone шыққалы жиырма жылға жуық уақыт өтсе де, бұл смартфондар компанияның жалпы сатылымының шамамен жартысын қамтамасыз етіп отыр.
Алайда тұтынушылық электроника нарығындағы басқа компаниялар сияқты, Apple да биыл құрамдас бөлшектердің, әсіресе жад микросхемаларының тапшылығына тап болды.
Соның салдарынан компания сұранысты толық қанағаттандыра алмай отыр. Бұған қоса, Apple өз өнімдерінің бүкіл желісінің бағасын көтеруге мәжбүр болды.
iPhone Duo қашан жеткізіле бастайды
Бастапқыда Apple iPhone Duo смартфондарын 23 қазанға дейін жеткізуді бастауды жоспарлаған. Алайда тапсырыс қабылдау басталғаннан бірнеше сағат өткен соң компанияның сайтында жеткізу мерзімі 2027 жылдың қаңтар айының соңына шегерілді.
АҚШ-тағы ұялы байланыс операторлары да жаңа тапсырыстарды орындау мерзімін едәуір ұзартқан.
Тағы да оқыңыз: Экран ауыстыру 999 доллар: бүктелетін iPhone Duo-ны жөндеу қанша тұрады
