11 қаңтар күні белгілі абайтанушы, әдебиеттанушы ғалым, филология ғылымдарының докторы Мекемтас Мырзахметұлы қайтыс болды. Қаралы хабарды Мұхтар Әуезов атындағы әдебиет және өнер институты жеткізді.
«Бүгін белгілі абайтанушы, әдебиеттанушы ғалым, филология ғылымдарының докторы, профессор, ҚР Мемлекеттік сыйлығының және «Түркі әлеміне қызмет» халықаралық сыйлығының иегері МЕКЕМТАС МЫРЗАХМЕТҰЛЫ өмірден өтті», – делінген хабарламада.
Мекемтас Мырзахметұлы 95 жасқа қараған шағында өмірден өтті. Ол Абай мұрасын зерттеп, шығармаларындағы философияның Жүсіп Баласағұн және Қожа Ахмет Яссауи философиясымен байланыстырған.
«Абай» энциклопедиясын құрастырып, Мұхтар Әуезовтің 20 томдық, 50 томдық шығармалар жинағын шығаруға атсалысқан.
Мекемтас Мырзахметұлы 1930-жылдары қазақ даласында болған ашаршылық куәгері. 12 баланың кенжесі болып, жалғыз өзі аман қалған. 1933 жылы әкесі қайтыс болғаннан кейін анасы бір ұл, бір қызбен қалған. Аштықтан қашып, ен далада қалғанда қыз баласын қасқырға тастап, ұлын сақтап қалған анасы туралы ғалымның өзі талай рет баяндап берген.
