Интернетте көптен күткен «Чужой: Земля» сериалының жаңа тизері жарық көрді. «Чужой» франшизасының приквелі осы жылдың жазында шығатыны белгілі болды.
Оқиға 2090 жылы Жер планетасында өрбиді. Басты кейіпкер — Венди есімді гибрид-метаадам, онда баланың ақылымен қатар толыққанды ересек адамның денесі бар.
Сериалдың авторы ретінде «Фарго» жобасымен танымал Ноа Хоули жұмыс істеген. Басты рөлдерді Сидни Чандлер, Тимоти Олифант, Алекс Лоутер және Эсси Дэвис сомдайды. Ал негізгі «Чужой» фильмінің авторы Ридли Скотт продюсерлік қызметті атқарды.
Франшизаның соңғы фильмі «Ромул» 2024 жылдың тамызында шыққан болатын. Бұл жоба әлемдік прокатта 350 млн доллар жинап, «Үздік визуалды эффектілер» номинациясы бойынша «Оскарға» ұсынылған еді. Disney мен 20th Century Studios қазірдің өзінде «Ромулдың» жалғасын түсіруді жоспарлап жатыр.
Сериалдың премьерасы жаз айларына жоспарланған. Нақты күні әлі белгісіз.
Еске сала кетейік, бұған дейін 97-ші «Оскар» сыйлығына үміткерлер тізімі жарияланған еді.
