Астаналық 7 жастағы шахматшы Абдулмалик Қайрат мектеп оқушылары арасында өткен әлем чемпионатында жеңіске жетті. Бұл туралы Қазақстан шахмат федерациясының баспасөз қызметі хабарлады.
Федерация мәліметінше, жарыс Сербияның Врнячка-Баня қаласында өтіп, Абдулмалик U7 санатында чемпион атанған алғашқы қазақстандық болды.
Абдулмалик шешуші ойында негізгі қарсыласы, Үндістан өкілі Ом Еш Готтумукаланы ұтты. 8-тур қорытындысы бойынша Абдулмалик 8 ұпай жинап, үндістандық шахматшыдан бір ұпай алда болды. Қарсыластар арасындағы тікелей жеңіс оған турнирдің соңғы турында-ақ чемпион атануына мүмкіндік берді.
U7 санатындағы жалпы нәтиже:
- 1. Абдулмалик Қайрат (Қазақстан, 1601) — 8 ұпай
- 2. Ом Еш Готтумукала (Үндістан, 1413) — 7 ұпай
- 13–21 орын: Айсултан Алмасұлы — 4 ұпай
Қыздар арасындағы G7 санатында үндістандық Прагника Вака Лакшми барлық 8 партияда жеңіске жетіп, алтын жүлдеге қол жеткізді.
G7 санаты:
- 1. Прагника Вака Лакшми (Үндістан, 1437) — 8 ұпай
- 4–8 орын: Альнура Шинбаева — 5 ұпай
- 9–10 орын: Венера Жәкішева — 4½ ұпай
- 18–22 орын: Сара Нұрмұхаммет — 3 ұпай
Биылғы жарысқа әлемнің 44 елінен 470 оқушы қатысып, 9 турдан тұратын швейцарлық жүйе бойынша ойнады. Әр партияға 90 минут және әр жүріске 30 секунд қосымша уақыт берілді. Қазақстаннан 40 жас шахматшы бақ сынады.
Жарыс әлі аяқталған жоқ — соңғы күні қалған жас топтарда жеңімпаздар анықталады. Қазірдің өзінде жеті жас санатында қазақстандықтар алтын жүлде үшін таласып жатыр.
Қалған санаттардағы қазақстандық қатысушылардың нәтижелері де қуантады:
- U11: Алимжан Жауынбай — 6½ ұпай (1-орын), Рамазан Төлеген — 6 ұпай
- G13: Ханзада Аманжол мен Ақнұр Мамағова — 5½ ұпай
- G9: Алишa Бисәлиева — 7 ұпай (1-2 орын)
Айта кетейік, 2024 жылы Перу астанасы Лимада өткен чемпионатта Айару Алтынбек (G13) алтын медаль, ал Қостанайлық Иман Нәбиев (O9) қола жүлде иеленген еді.
