Air Astana әуе компаниясы Кипрдің Ларнака қаласына бағытталған маусымдық тікелей рейстерге билет сатуды бастады. Компания баспасөз қызметінің хабарлауынша, рейстер 2026 жылдың жаз мезгілінде Астана мен Алматы қалаларынан орындалады.
Астанадан ұшу кестесі
Елордадан Ларнакаға рейстер 2 маусым мен 5 қыркүйек аралығында аптасына екі рет – сейсенбі және сенбі күндері жүзеге асырылады. Ұшақтар таңертең және күндіз ұшады, ал Ларнакадан кері рейстер күннің екінші жартысында орындалады.
Ұшу ұзақтығы Ларнакаға дейін шамамен 5 сағат 40 минут, ал кері бағытта сәл қысқарақ болады.
Алматыдан рейстер
Алматыдан Ларнакаға рейстер 4 маусым мен 6 қыркүйек аралығында бейсенбі және жексенбі күндері жоспарланған. Алматыдан ұшу таңертең ерте, ал Кипрден кері рейс күндіз жүзеге асады.
Ұшу уақыты Ларнакаға дейін шамамен 6 сағат 5 минут, ал кері бағытта шамамен 5 сағат 30 минутты құрайды. Барлық рейстер заманауи Airbus A321LR ұшақтарымен орындалады.
Билет бағасы
Билеттер қазірдің өзінде Air Astana компаниясының ресми сайтында және агенттіктер арқылы сатылымға шықты.
Алматы – Ларнака бағыты бойынша эконом-класс билеттері екі бағытқа 300 819 теңгеден, ал бизнес-класс билеттері 783 377 теңгеден басталады.
Астана – Ларнака бағыты бойынша эконом-класс билеттерінің ең төменгі бағасы 286 881 теңге болса, бизнес-класс билеттері 729 814 теңгеден басталады.
Ларнака – Кипрдегі танымал курорт
Ларнака – Кипрдің оңтүстік-шығысындағы танымал курорт қаласы. Мұнда жағажайлар, серуендеуге арналған жағалау аймақтары мен тарихи ескерткіштер көп. Қалада Хала Сұлтан Текке мешіті, IX ғасырда салынған Әулие Лазарь шіркеуі орналасқан. Сондай-ақ туристер Финикудес жағалауында серуендеп, Маккензи жағажайында демала алады.
Еске сала кетейік, бұған дейін Air Astana ұшақтары Иран әуе кеңістігін айналып ұшатынын жазған едік.
