Қазақстандық продюсер әрі актриса Баян Алагөзова толығымен АҚШ-та америкалық актерлердің қатысуымен түсірілген «WHAT IS ҰЯТ?» атты жаңа фильмінің жұмысын аяқтады. Бұл жаңалығымен ол әлеуметтік желіде бөлісіп, сахна артындағы кадрларды көрсетті және халықаралық команданың жұмысы туралы жазды.
«Достар! Сіздермен тамаша жаңалықпен бөліскім келеді. Біз Америкада фильм түсірдік! «WHAT IS ҰЯТ?» – толығымен америкалық актерлер ойнаған алғашқы қазақстандық фильм. Жалғыз қазақ актрисасы – басты рөлді, яғни алыс қашықтыққа қатынайтын жүргізушіні (дальнобойщица) керемет сомдаған Дариға Бадықова болды. Ұзақ дайындықтан кейін осы істі ақыры жүзеге асырғанымызға қуаныштымын. Барша командаға жұмысы үшін алғыс айтамын және жақын арада бұл өте қызықты оқиғаны үлкен экрандардан көресіздер деп үміттенемін!» – деп жазды Алагөзова.
Продюсердің айтуынша, бұл жоба отандық кинематограф үшін маңызды оқиға болмақ және көрермендерді ауқымымен де, сюжетке деген ерекше көзқарасымен де таңғалдыруға уәде береді.
