29 мамырда Алматының Орталық стадионында өтетін KESHYOU тобының 20 жылдық мерейтойлық кешіне дайындық жұмыстары қызу жүріп жатыр. Ұйымдастырушылардың айтуынша, бұл жай ғана концерт емес, еліміздің мәдени тарихын айшықтайтын ауқымды музыкалық оқиға болмақ.
Дайындық барысы
Концерттің жоғары деңгейде өтуі үшін дайындық жұмыстары бірнеше айдан бері тоқтаусыз жалғасып жатыр. Шоу үшін арнайы 450-ден астам костюм дайындалып, ерекше сценография мен реквизиттер әзірленген. Жобаға қатысу үшін жеке кастингтен өткен 48 биші таңдап алынып, қазіргі таңда олармен негізгі қойылымдар пысықталып жатыр. Команда шоу элементтерінің бір бөлігі тек осы кешке арналғанын, кейін ешқашан қайталанбайтынын алға тартты.
Сахнадағы тосынсый
Мерейтойлық кеште жоба тарихында алғаш рет әр жылдардағы аты аңызға айналған құрамдар бір сахнада кездеседі. Продюсер Баян Алагөзова концерт жобаның 20 жылдық жолын көрсетуге тиіс екенін атап өтті. Сонымен қатар, ұйымдастырушылар әртістер күтпеген жерден пайда болатындай шоу бағдарламаны, соңына дейін құпия сақталатын бірнеше музыкалық коллаборацияларды уәде етіп отыр.
KESHYOU мерейтойлық шоуының билеттері Ticketon.kz және Yandex Afisha платформаларында сатылып жатыр.
Айта кетейік, бұл концертте KESHYOU тобының алтын құрамына айналған Жанар Дұғалова, Айдана Меденова мен Кәмшат Жолдыбаеваның триосы қайта бас қосады.
