Жаз мезгілінде көпшілік күннен қорғайтын кремді тек жағажайға барар алдында ғана пайдаланады. Алайда ультракүлгін сәулелер теріге қалада серуендегенде де, тауда жүргенде де, тіпті қыста да әсер етеді. Kursiv LifeStyle SPF 15, 30 және 50+ деңгейлерінің айырмашылығы қандай екенін және қай жағдайда қайсысын таңдаған дұрыс екенін түсіндірді.
«Золотое Яблоко» дүкендер желісінің косметологі Мила Устинованың айтуынша, SPF деңгейін таңдағанда тек тері түрін ғана емес, уақытты қайда өткізетініңізді де ескеру қажет.
Күн сәулесі негізінен екі түрге бөлінеді. UVA-сәулелері терінің терең қабатына өтіп, әжімдердің ерте пайда болуына және пигментті дақтардың түзілуіне ықпал етеді. Ал UVB-сәулелері терінің үстіңгі қабатына әсер етеді. Бұл сәулелер терінің қараюына және күннен күйіп қалуына әкелуі мүмкін.
SPF (Sun Protection Factor) – күннен қорғайтын құралдың теріні UVB-сәулелерінен қаншалықты тиімді қорғайтынын көрсететін көрсеткіш. Сонымен қатар мұндай құралдар UVA-сәулелерінен де белгілі бір деңгейде қорғаныс береді.
SPF 15, 30 және 50+ деңгейлерінің айырмашылығы қандай
SPF көрсеткіші күн сәулесінің зиянды әсерінің қанша бөлігін бөгейтінін көрсетеді. Қорғаныс деңгейлері арасындағы айырмашылық аз болып көрінгенімен, сезімтал тері үшін оның маңызы зор болуы мүмкін.
Қай SPF деңгейін таңдаған дұрыс
Маманның айтуынша, күннен қорғайтын құралдың SPF деңгейін таңдағанда екі негізгі фактор ескерілуі керек: терінің фототипі және күн астында қанша уақыт болатыныңыз.
Терісі ақшыл, күнге тез күйіп қалатын адамдарға мамандар SPF 50+ қолдануды ұсынады. Ал терісі тез қарайып, сирек қызаратын адамдар үшін қала жағдайында SPF 15–30 деңгейіндегі қорғаныс әдетте жеткілікті болады.
«14 жасқа дейінгі балаларға тек SPF 50+ қолданған жөн. Бұл жаста терінің пигменттік жүйесі әлі толық қалыптаспағандықтан, ол ультракүлгін сәулелерден жеткілікті деңгейде қорғана алмайды», – деп түсіндірді Мила Устинова.
Қазақстанда қандай SPF деңгейін таңдаған дұрыс
Қалада серуендеуге арналған SPF
Егер жұмысқа барып-келсеңіз, Алматы, Астана немесе Шымкент көшелерінде серуендеп, күн астында ұзақ болуды жоспарламасаңыз, SPF 15–30 жеткілікті болады. Ал серуен ұзаққа созылса немесе сыртта аптап ыстық болса, SPF 30–50 деңгейіндегі қорғанысты таңдаған дұрыс.
Табиғат аясында демалуға арналған SPF
Ақтау жағажайына барғанда, Бурабай демалыс аймағында немесе табиғат аясында бірнеше сағат өткізуді жоспарласаңыз, SPF 30–50+ қолдану ұсынылады. Бұл терінің күнге қаншалықты тез күйетініне қарамастан, тиімді қорғаныс береді.
Тауда серуендеуге арналған SPF
Шымбұлақ, Медеу және басқа да биік таулы бағыттарда теріні барынша қорғау қажет. Биіктік артқан сайын ультракүлгін сәулелердің әсері күшейе түседі. Ал айналада қар болса, күн сәулесін шағылыстыратындықтан, терінің күйіп қалу қаупі одан сайын жоғарылайды.
SPF кремін қалай дұрыс қолдану керек
Косметологтың кеңесіне сәйкес, күннен қорғайтын кремді сыртқа шығардан 15–20 минут бұрын жағу керек. Қорғаныс қабатын әр екі сағат сайын, сондай-ақ суға түскеннен кейін жаңартып отырған жөн. Бұл тіпті құралдың суға төзімді екені көрсетілсе де маңызды.
Бет пен мойынға шамамен ширек шай қасық крем жеткілікті. Ал бүкіл денеге жағу үшін шамамен 30 мл құрал қажет, бұл бір ас қасыққа жуық мөлшер.
Бетке жағу кезінде мамандар «екі саусақ ережесін» ұстануды ұсынады.
«Құрамына қарай күннен қорғайтын кремдер теріге әртүрлі жағылады. Кейбір құралдар теріде майлы жылтыр әсерін қалдыруы мүмкін. Бұл қалыпты жағдай: біріншіден, санскрин теріге жеткілікті қалың қабатпен жағылады, екіншіден, ультракүлгін сүзгілердің біркелкі таралуы үшін олардың майлы компоненттерде еруі қажет», – дейді Мила Устинова.
Күннен қорғайтын кремді дұрыс жағумен қатар, оны дұрыс сақтау да маңызды. Тіпті қымбат құралдың өзі бұзылып кетсе, тиімділігін жоғалтып, пайдасыз болуы мүмкін.
Осыған дейін мамандар аптап ыстықта жүгірген кезде ескеру қажет маңызды кеңестермен бөліскен болатын.
