ҚР Ұлттық статистика бюросының мәліметінше, 2026 жылдың алғашқы тоқсанында Қазақстан экономикасы 3%-ға өсті. Соған қарамастан, өңірлердегі жағдай біркелкі болмады: төрт облыста жалпы өңірлік өнім өткен жылдың сәйкес кезеңімен салыстырғанда төмендеген.
Ең үлкен құлдырау Атырау облысында тіркелді. Өңір экономикасы бір жылда 12,1%-ға қысқарды. Батыс Қазақстан облысында төмендеу 8,1%, Ақмола облысында 5,3%, Шығыс Қазақстан облысында 3,4% болды.
Ал ең жоғары өсімді Солтүстік Қазақстан облысы көрсетті — 12,9%. Жамбыл облысының экономикасы 11,7%-ға, Ұлытау облысы 11,4%-ға өсті. Түркістан облысында өсім 9,6%-ды, Астана мен Шымкентте 8,9%-ды құрады.
Бұл деректер республика экономикасы жалпы өскенімен, өсімнің өңірлер арасында әркелкі қалыптасқанын көрсетеді. Әсіресе мұнайлы батыс облыстарындағы төмендеу жалпы экономикалық динамикаға кері әсер еткен.
Тағы да оқыңыз: Қазақстанның экономикасы қай өңірлерге ауып жатыр?
