АҚШ пен Бразилия арасындағы сауда дауы жаңа кезеңге өтті. 22 шілдеден бастап Вашингтон Бразилиядан әкелінетін бірқатар тауарға 25% кедендік баж енгізді. Жаңа тариф жылына шамамен 7-11 млрд доллардың экспортына әсер етуі мүмкін. Бұл Бразилияның АҚШ нарығына шығаратын бүкіл өнімінің 18-26%-ы.
Жаңа баж ауыл шаруашылығы техникасына, ағаш өнімдеріне, этанолға, киімге, аяқкиімге және бірқатар өнеркәсіптік тауарға қатысты. Ал АҚШ нарығы үшін маңызды саналатын кофе, сиыр еті мен ұшақ бөлшектері әзірге қосымша тарифтен босатылды.
Бұл шешім әсіресе АҚШ нарығына тәуелді бразилиялық кәсіпорындарға ауыр тиюі мүмкін. Мысалы, аяқкиім өндірушілері биыл экспорт көлемі 7,1%-ға қысқаруы ықтимал деп болжап отыр. АҚШ-қа көп өнім сататын Франка қаласындағы компаниялар тапсырыстар азайса, жұмыс орындарын қысқартуға мәжбүр болуы мүмкін.
Вашингтон бұл қадамды Бразилиядағы электронды төлем жүйелері, америкалық этанолдың нарыққа кіруі және заңсыз орман кесуге қатысты мәселелермен түсіндірді. Бразилия тарапы мұндай айыптауларды негізсіз деп санайды және келіссөзді жалғастыруға тырысып жатыр.
Бразилия үкіметі өз кәсіпкерлеріне қолдау көрсетпек
Бразилия үкіметі зардап шегетін компанияларды қолдау үшін 3,66 млрд долларлық жеңілдетілген несие бағдарламасын жариялады. Қаржы болат, алюминий, аяқкиім және экспортқа тәуелді басқа салаларға айналым қаражатын толықтыруға, инвестиция салуға және жаңа нарықтар іздеуге беріледі.
Бірақ қауіп мұнымен аяқталмауы мүмкін. АҚШ-та Бразилиядағы мәжбүрлі еңбекке қатысты бөлек тексеру жүріп жатыр. Оның нәтижесінде кейбір тауарларға тағы 12,5% баж енгізіліп, жалпы тариф 37,5%-ға дейін көтерілуі ықтимал.
Жаңа тарифтер АҚШ-тағы импорттаушыларға да әсер етеді. Олар Бразилия тауарларын бұрынғыдан қымбат сатып алуы немесе басқа жеткізушілер іздеуі керек. Ал Бразилия компаниялары үшін басты міндет – АҚШ нарығындағы үлесін сақтап қалу немесе өнімін басқа елдерге бағыттау.
Тағы да оқыңыз: Баж салығы салынбайды: Қазақстан Қытайдан жанар-жағармай сатып алмақ.
