Жазда қазақстандықтардың жартысына жуығы толық демала алмаған, ал әрбір екінші адамның жұмыс жүктемесі артқан. Сонымен қатар сауалнамаға қатысқандардың 55%-ы күзде табысын арттырғысы келетінін айтқан. Бұл – hh.kz платформасы Қазақстандағы 822 жұмыс іздеуші мен жұмыс беруші арасында жүргізген сауалнама нәтижесі.
Респонденттердің жартысына жуығы толық демала алмаған
Сауалнамаға қатысқандардың бәрі бірдей жазда жақсы демалып, күш жинай алмаған. Респонденттердің 35%-ы іс жүзінде демалмаған, тағы 14%-ы демалысы жеткіліксіз болғанын айтқан.
Ал 25%-ы жақсы демалып, күш жинаған. Тағы 17%-ы жалпы жазға көңілі толатынын, бірақ көбірек демалғысы келгенін айтқан. Респонденттердің 9%-ы негізгі еңбек демалысын әлі алмаған.
Осылайша, сауалнамаға қатысқандардың 49%-ы не мүлде демалмаған, не алған демалысын жеткіліксіз деп санайды.
Әрбір екінші адамның жұмыс жүктемесі артқан
Респонденттердің 50%-ының жаз мезгілінде жұмыс жүктемесі көбейген. Олардың жартысы әдеттегіден едәуір көп жұмыс істеген, қалғандары тапсырмалар көлемі аздап артқанын айтқан.
Тағы 24%-ының жұмыс жүктемесі өзгермеген, ал 9%-ында жұмыс көлемі азайған. Қалған 17%-ы жазда жұмыс істемеген.
Демалыс пен демалыс күндері жұмыс мәселелерінен толықтай қол үзе алғандар небәрі 18% болды. Респонденттердің 21%-ы тұрақты түрде жұмыс істеген, ал 28%-ы жекелеген жағдайларда хабарламалар мен қоңырауларға жауап беріп немесе жұмыс мәселелеріне қайта оралған.
Сонымен қатар сауалнамаға қатысқандардың 16%-ы мүлде еңбек демалысына шықпаған.
Әрбір үшінші қазақстандық жұмысын ауыстырғысы келеді
Жаз мезгілі сауалнамаға қатысқандардың көпшілігін қазіргі жұмыс орнына деген көзқарасын қайта қарауға итермелеген. Респонденттердің 21%-ы жаңа жұмыс іздеуге шешім қабылдаған, тағы 18%-ы бұл мүмкіндікті қарастырып жүр, бірақ әзірге нақты шешім қабылдамаған.
Респонденттердің 12%-ы еңбек жағдайын өзгерткісі келеді. Төрттен бірінің жұмысқа деген көзқарасы өзгермеген, ал 7%-ы қазіргі жұмыс орнын бұрынғыдан жоғары бағалай бастаған.
Жаз соңына қарай сауалнамаға қатысқандардың 18%-ы шаршағанын және демалғысы келетінін айтқан. Тағы 10%-ы жұмыстан қатты шаршағанын жеткізген. Ал өзін тың әрі күш-қуаты мол сезінетіндер небәрі 9% болды.
Көпшілік күзде көбірек ақша тапқысы келеді
Күздің басталуымен сауалнамаға қатысқандардың 55%-ы көбірек ақша тапқысы келеді. Ал 36%-ы жаңа жұмыс іздеуді, 25%-ы қосымша дағдыларды немесе жаңа мамандықты меңгеруді жоспарлап отыр.
Сонымен қатар респонденттер:
- 16%-ы икемді жұмыс кестесіне ауысқысы келеді;
- 15%-ы аз жұмыс істеп, көбірек демалғысы келеді;
- 13%-ы қызметте жоғарылауды қалайды;
- 11%-ы еңбек демалысына шығуды жоспарлап отыр.
Тек 5%-ы ғана ештеңені өзгерткісі келмейді. Бұл сұрақта бірнеше жауап нұсқасын таңдауға мүмкіндік берілген.
Тағы да оқыңыз: Қазақстандықтардың 74%-ы еңбек демалысы кезінде де жұмыс істейді
