Қазақстандық велошабандоз Алексей Луценко Жапонияның Аичи мен Нагоя қалаларында өтіп жатқан 2026 жылғы Жазғы Азия ойындарында топтық жарыста алтын медаль еншіледі. Бұл – ұлттық құрама көшбасшысының құрлықтық додадағы алтыншы чемпиондық атағы, деп хабарлайды Kursiv.Media Ұлттық олимпиада комитетіне сілтеме жасап.
Осы жеңісінің арқасында Луценко жазғы Азия ойындарында жеңіп алған алтын медальдар саны бойынша Қазақстан тарихындағы абсолютті рекордты жаңартты.
Константин Негодяевтің 28 жылдық рекорды жаңарды
Осы ойындарға дейін Азия ойындарында ең көп медаль алған спортшы қазақстандық каноэші Константин Негодяев болған еді. Ол Азия ойындарында бес рет чемпион атанған (Хиросима-1994 ойындарында 3 алтын, Бангкок-1998-де 2 алтын).
Алексей Луценко 2026 жылғы Азия ойындарында бұған дейін жекелей уақытқа жарыста да топ жарып, алтын медаль санын беске жеткізіп, рекордты теңестірген болатын. Ал топтық жарыстағы жеңісі оны жалғыз рекордшы мәртебесіне көтерді.
Луценконың Азия ойындарындағы жүлделері
Ол құрлықтық бәсекеде тұрақты түрде жоғары нәтиже көрсетіп келе жатқан бірегей спортшы:
2014 жыл (Инчхон): Жекелей уақытқа жарыс – Алтын
2018 жыл (Джакарта): Жекелей уақытқа жарыс – Алтын, Топтық жарыс – Алтын
2022 жыл (Ханчжоу): Жекелей уақытқа жарыс – Алтын, Топтық жарыс – Күміс
2026 жыл (Аичи-Нагоя): Жекелей уақытқа жарыс – Алтын, Топтық жарыс – Алтын
Осылайша, Алексей Луценко жазғы Азия ойындарында алты алтын медаль жеңіп алған отандық спорт тарихындағы тұңғыш атлет атанды.
