Елордада 16 мың салық төлеуші айыппұл төлеуден босатылды
Нұр-Сұлтанда 2020 жылы жарияланған жеке тұлғаларға арналған салық амнистиясының алғашқы нәтижелері белгілі болды. «Инстаграмдағы» әкімдіктің ресми парақшасында өткен тікелей эфирде елорда мемлекеттік кірістер департаменті өндірістік төлемдер басқармасы басшысы Ерлан Бакиров бүгінде жалпы сомасы 49 миллион теңгеге 16 мың салық төлеуші айыппұл төлеуден босатылғанын айтты. Бұл туралы Нұр-Сұлтан әкімдігінің баспасөз қызметі хабарлады.
«Бүгінгі таңда Нұр-Сұлтан қаласы бойынша рақымшылық басталғаннан бері 1,1 млрд теңгеге жуық жеке меншікке салық сомасы бар, онда өсімпұл сомасы 447 млн теңгеге тең. Қазіргі уақытта өсімпұл 16 мың салық төлеушіге 49 млн теңгеге есептен шығарылды», – деді Ерлан Бакиров.
Спикер есептен шығару тек негізгі салық толық төленген жағдайда ғана жүзеге асырылатынын атап өтті. Атап айтқанда, рақымшылық жергілікті мүлік салығына қатысты – жер салығы, мүлік салығы, көлік құралдары салығы.
«Қазақстан Республикасы Қаржы министрінің 2020 жылғы 13 тамыздағы бұйрығына сәйкес, 2020 жылдың 1 қаңтарына дейін есептелген 2019 жылғы салықты (жер және мүлік) қоспағанда, 2020 жылғы 1 сәуірдегі жағдай бойынша қарыз бойынша өсімпұлдар есептен шығарылады», – деді басқарма басшысы.
Ол сонымен қатар өсімпұлды есептен шығару 2021 жылдың 5 қаңтарына дейін жүргізілетінін атап өтті. Рақымшылық мерзімі аяқталғаннан кейін салық берешегі бар салық төлеушілерге өндіріп алу шаралары қолданылады.
