Бүгін таңғы 8-ден бастап бүкіл Қазақстан төтенше жағдай режимінде. Ел тарихында алғаш рет жарияланған төтенше жағдай мемлекет басшысының жарлығына сәйкес, сәуірдің 15-не дейін жалғасады. Қажет болған жағдайда, уақыты ұзартылуы мүмкін.
Осы жарлық бойынша елде карантин енгізіліп, қоғамдық маңызы бар мекемелердегі күзет күшейтіледі, ірі сауда нысандарының жұмысына шектеу қойылып, барлық сауда ойын-сауық орталықтары, кинотеатр, театр, көрмелердің және адамдар көп жиналатын басқа да объектілердің қызметін тоқтайды. Ойын-сауық, спорттық және басқа да бұқаралық іс-шаралар, сондай-ақ той-томалақ, ас-жиын өткізуге тыйым салынды.
Ақорда баспасөз қызметі таратқан хабарламаға сәйкес, төтенше жағдай режимін қамтамасыз ету үшін Қазақстан Республикасының Үкіметі резервінен қажетті қаражат бөлінеді. Айта кетейік, бұған дейін коронавирустың алдын алу шараларына ел қазынасынан 1,5 млрд теңге бөлінген.
Сауда және интеграция министрлігінің хабарлауынша, азық-түлік дүкендері мен базарлар жұмысын жалғастырады. Ведомство таратқан мәліметте «министрлік республикада енгізілген төтенше жағдайлар кезінде азық-түлік базарлары мен дүкендер жұмысын жалғастыратындығын хабарлайды. Азық түлік дүкендері де басқа да шағын маркеттер, сауда-ойын-сауық орталықтарынан тыс орналасқан өзге бизнес нысандары иесінің қалауына қарай жұмысын жалғастыра алады» делінген.
Сыртқы істер министрлігі төтенше жағдай кезінде Қазақстан Республикасының азаматтары мен шетелдіктердің мемлекеттік шекара арқылы кіруіне – шығуына шектеу енгізілетін мәлімдеді.
Осы орайда мемлекет басшысы халықты сабырға шақырып, дүрбелеңге салынбауға шақырған. Өзінің парақшасында президент: «өкінішке қарай, коронавирус Қазақстанды да айналып өтпеді. Үкімет пен әкімдер өзіміздің және шетел азаматтарының қауіпсіздігі үшін айрықша шаралар қабылдауда. Жағдай толық бақылауда. Сабырлық танытып, жеке гигиенаны сақтау қажет. Арандатушылар жазаланады. Баршаңызға мықты денсаулық тілеймін» деп жазды.
Ресми дерек бойынша, қазіргі кезде Қазақстанда 9 адам коронавирус жұқтырған. Вирус жұқтырған алғашқы кісілер жайлы ақпарат 13 наурызда жарияланды.
Денсаулық сақтау министрлігі тұрғындардан сақтық шараларына үлкен мән беруді сұрайды. Қолды сабындап жуып, антисептик пайдалануды, жеке бас тазалығын сақтау, адам көп жиналатын орындарға бармау, лажы болса үйде отыруды ұсынады.
