Фото: kursiv.media
Көктемгі егіске және егінді уақытында жинау үшін шаруаларға 140 млрд теңге бөлінді. Бұл туралы Ауыл шаруашылығы министрі Ербол Қарашөкеев хабарлады.
Министрдің пікірінше, егін жинау науқанын сәтті өткізудің негізгі мәселесі — фермерлерді қаржымен қамтамасыз ету.
«Былтырғыдай «Аграрлық несие корпорациясы» АҚ желісі бойынша көктемгі егіс және егін жинау жұмыстарын қаржыландырудың жалпы сомасы – 140 млрд теңге. 3,8 мың ауыл шаруашылығы тауарын өндіруші қаржыландырылды», – деді Қарашөкеев Үкімет отырысында.
Азық-түлік корпорациясының желісі бойынша азық-түлік корпорациясының ресурстарына астық жеткізудің қажетті көлеміне келісімшарт жасалған.
«Ол үшін 81,2 млрд теңге, оның ішінде форвардтық сатып алу шеңберінде 21,2 млрд теңге, тауарлық кредит арқылы 60 млрд теңге бөлінді. Қазіргі бірінші міндет – өсірілген егінді шығынсыз жинау. Мұнда «Қазгидрометтің» болжамдарын ескеру керек», – деді ол.
Ауыл шаруашылығы министрлігінің мәліметінше, биыл егінді жинау үшін Қазақстанда 149,9 мың трактор, 38,6 мың астық жинайтын комбайн, 13,5 мың орақ бар.
Бұған дейін министр барлық өңірде егін жинау басталғанын айтқан еді.
