Қазақстандық TOO Elem Group Еуропалық Одақтың санкциясына ілікті. Тізім ұйымның ресми сайтында Ресейге қарсы шектеулер пакеті аясында жарияланды.
Жаңа экспорттық шектеулер, ресейлік әскери-өнеркәсіп кешеніне қатысы бар жеке тұлғалар мен компанияларға қарсы санкциялар жарияланған күннен кейін күшіне енеді.
Қолда бар мәліметке сүйенсек, Elem Group электронды және телекоммуникациялық жабдықтар мен олардың бөлшектерін көтерме саудамен айналысады.
Компанияға Украинаның аумақтық тұтастығына, егемендігі мен тәуелсіздігіне нұқсан келтіру немесе қауіп төндіруге бағытталған әрекеттеріне байланысты санкция салынды.
Айта кететіні, бүгін Еуропалық Одақ Ресейге қарсы 13-ші санкциялар пакетін жариялады. Тізімге Ресейдің әскери-өнеркәсіптік кешенін тікелей қолдайтын 27 ұйым енгізілді.
«Бұл ұйымдардың кейбірі үшінші елдерде орналасқан. Оның ішінде, Қазақстан, Үндістан, Шри-Ланка, Қытай, Сербия, Таиланд және Түркия бар. Екіұшты мақсаттағы тауарлар мен технологияларға, сондай-ақ ресейлік қорғаныс және қауіпсіздік секторы технологияларын жетілдіруге ықпал ететін тауарлар мен технологияларға қатаң экспорттық шектеулер қойылады», – деп жазылған құжатта.
Компанияларға «сауда шектеулерін айналып өтуге қатысы бар» деген айып тағылып отыр. Сонымен қатар, ЕО 106 жеке және 88 заңды тұлғаға шектеу енгізді. Оның барлығы жаңа санкциялар пакетінде қамтылған.
Естеріңізге сала кетейік, Financial Times ЕО-ның жаңа санкциялар пакеті қазақстандық компанияларға әсер ететінін хабарлаған болатын.
2023 жылы 29 қыркүйекте Еуропалық комиссия сарапшылары бірқатар елдерге ескерту жасады. Атап айтқанда, Ұйым Ресейге қарсы санкциялардың қатаң сақталуын қамтамасыз етуін талап етті. Сонымен қатар тиісті шараларға мән беруге шақырды. Сынға ұшыраған мемлекеттердің арасында Қазақстан да болды.
Бұған дейін Астана бейтараптық пен көпвекторлық саясат аясында Батыстың шектеулеріне бағынатынын бірнеше рет атап өткен.
Тіпті 24 мамырда Қаржы министрі Ерұлан Жамаубаев: «Қазақстан Ресейге дрон мен чип жеткізіп отырған жоқ», – деп ресми мәлімдеме жасады.
Бұған БАҚ бетінде жарияланған «Қазақстаннан Ресейге дрондар мен чиптер тасымалданғаны» туралы ақпарат негіз болды.
Былтыр 19 қазанда Сауда және интеграция вице-министрі Қайрат Төребаев Сенат кулуарында Қазақстан Ресейге 106 тауар экспортын шектегенін мәлімдеді. Олардың арасында дрон мен чиптер де болған.
