2024 жылы әлемдегі ең жоғары жалақы алатын футболшылардың тізімін америкалық Forbes журналы жариялады.
Бұл рейтингте футболшылардың клубтарынан алатын жалақылары мен жеке демеушілік келісімшарттарынан түсетін табыстары есепке алынған. Ең көп табыс табатын футболшы ретінде екінші жыл қатарынан португалиялық шабуылшы Криштиану Роналду көш бастап тұр. Сауд Арабиясының «Аль-Наср» клубының ойыншысы 2024/25 маусымының соңына дейін $285 млн табысқа жетеді. Оның $220 млн жалақысы мен сыйақылары болса, қалған $65 млн-ды демеушілік келісімдерден алады. Осылайша, Роналду өзінің былтырғы рекордын жаңартып, табысын $25 млн-ға арттырды.
Көшбасшылар қатарында кімдер бар?
Екінші орында аргентиналық Лионель Месси тұр. Қазіргі таңда ол АҚШ-тың МЛС лигасындағы «Интер Майами» клубының намысын қорғап жүр. Мессидің жылдық табысы $135 млн құрайды, оның $60 млн клубтан алынса, $75 млн түрлі демеушілік және жарнамалық келісімшарттардан түседі.
Үздік үштікті бразилиялық Неймар аяқтайды. Жақында ғана «Пари Сен-Жерменнен» Сауд Арабиясының «Аль-Хиляль» клубына ауысқан ол жылына $110 млн табыс табады, оның $80 млн клубтық табысы болса, $30 млн демеушіліктен түседі.
Сауд Арабиясының футболы – ойыншылар үшін жаңа нарық
Роналду мен Неймардың Сауд Арабиясының клубтарында ойнайтынын ескерсек, бұл елдің чемпионаты әлемдегі ең қымбат футболшыларды өзіне тартып отырған жаңа қаржылық орталыққа айналды. Ең көп табыс табатын футболшылар арасында Сауд Арабиясында өнер көрсетіп жүрген тағы екі ойыншысы бар: Карим Бензема («Аль-Иттихад») жылына $104 млн табыс тапса, сенегалдық Садио Мане («Аль-Наср») $52 млн алады.
Форбстың ең жоғары жалақы алатын футболшыларының ондығы келесідей:
1. Криштиану Роналду («Аль-Наср») — $285 млн (220 млн клубтағы табыс + 65 млн демеушілік келісімдер)
2. Лионель Месси («Интер Майами») — $135 млн (60 млн клубтағы табыс + 75 млн демеушілік келісімдер)
3. Неймар («Аль-Хиляль») — $110 млн (80 млн клубтағы табыс + 30 млн демеушілік келісімдер)
4. Карим Бензема («Аль-Иттихад») — $104 млн (100 млн клубтағы табыс + 4 млн демеушілік келісімдер)
5. Килиан Мбаппе («Реал Мадрид») — $90 млн (70 млн клубтағы табыс + 20 млн демеушілік келісімдер)
6. Эрлинг Холанд («Манчестер Сити») — $60 млн (46 млн клубтағы табыс + 14 млн демеушілік келісімдер)
7. Винисиус Джуниор («Реал Мадрид») — $55 млн (40 млн клубтағы табыс + 15 млн демеушілік келісімдер)
8. Мохамед Салах («Ливерпуль») — $53 млн (35 млн клубтағы табыс + 18 млн демеушілік келісімдер)
9. Садио Мане («Аль-Наср») — $52 млн (48 млн клубтағы табыс + 4 млн демеушілік келісімдер)
10. Кевин Де Брюйне («Манчестер Сити») — $39 млн (35 млн клубтағы табыс + 4 млн демеушілік келісімдер)
Жоғарыда көрсетілгендей, қазіргі заманда футболшылардың табысы тек алаңдағы ойынымен ғана шектелмейді. Клубтық жалақылардан бөлек, демеушілік және жарнамалық келісімшарттар ойыншыларға қосымша мол табыс әкеліп отыр. Сауд Арабиясының чемпионаты мен АҚШ-тың МЛС лигасы Еуропа біріншілітеріне қарағанда футболшылардың жалақыларын көтеріп, қаржылық тұрғыдан аса маңызды орталықтарға айналды.
Еске сала кетейік, бұған дейін Transfermarket әлемдегі ең қымбат ойыншылардың тізімін жариялаған еді. Әлемдегі ең қымбат ойыншы болып норвегиялық Эрлинг Холанд атанған еді.
Криштиану Роналду сонымен қатар, әлемдегі ең ірі әлеуметтік желілерде миллиард жазылушысы бар бірінші адам ретінде тіркелді.
