Өзбекстан президенті Шавкат Мирзиёев ұлттық құраманың қорғаушысы Абдукодир Хусановтың ағылшындық «Манчестер Сити» клубына ауысуы туралы пікір білдірді деп жазады gazeta.uz басылымы.
Өзбек президентінің Абу-Даби ханзадасы әрі клубтың иесі шейх Халид ибн Мұхаммед Әл Нахаянмен сұхбатынан үзінді «Өзбекстан 24» телеарнасының «Менимча» бағдарламасында көрсетілді.
Абу-Даби ханзадасы Абдукодир Хусановтың трансфері туралы айтып, оны Шавкат Мирзиёевпен талқылаған. Президент жаңалықтан хабардар екенін білдіріп, қызығушылық танытқаны үшін алғысын айтқан.
«Мен бұл оқиғаға өте қуаныштымын», – деді Мирзиёев.
Футболшы туралы пікір білдірген шейх Халид ибн Мұхаммед Әл Нахаян оны «өте жылдам, мықты және батыл жас жігіт» деп сипаттап, «кәсіби футболшы мен дарынды жігітті» тәрбиелеген өзбек халқына құрмет білдірді.
Бұған дейін, 11 қаңтарда танымал футбол журналисі Фабрицио Романо 20 жастағы орталық қорғаушы, «Ланс» клубының ойыншысы Абдукодир Хусановтың «Манчестер Сити» клубына 40 миллион еуроға ауысқанын хабарлаған.
