Нью-Йоркте өткен халықаралық автокөрме аясында World Car of the Year 2025 (WCOTY) беделді автожүлдесінің жеңімпаздары жарияланды.
Биылғы басты марапатты Kia EV3 атты корейлік электромобиль иеленді. Осылайша Оңтүстік Корея бренді қатарынан екінші жыл үздік деп танылды. Айта кететіні, өткен жылы бұл атаққа аталған компанияның EV9 моделі ие болған еді.
2025 жылы автоконцерн басты номинация бойынша таласта BMW X3 және Hyundai Inster сияқты мықты қарсыластарынан озып, EV3-нен алға шықты. Айта кетейік, Hyundai Inster басты атақты жеңе алмаса да, «Жылдың электромобилі» номинациясында жеңіске жетті. Нәтижесінде дәл сол Kia EV3 пен Porsche Macan Electric моделін артта қалдырды.
World Car of the Year туралы
World Car Awards — әлемдегі ең беделді автожүлделердің бірі. Ол 2005 жылдан бері жыл сайын табысталып келеді және автомобиль саласының «Оскары» саналады. Бұл марапаттың бірегейлігі — оның нағыз халықаралық сипатында. Жеңімпаздарды 30-дан астам елден келген 100-ден аса кәсіби автошолушы жыл бойы сынақтан өткізген соң анықтайды.
Марапаттың басты мақсаты — техникалық жетілдіру, жаңашылдық, үнемділік, қауіпсіздік және қолжетімділік тұрғысынан үздік деп танылған автокөліктерді сұрыптау. Финалға шығу үшін автокөліктер келесі талаптарға сай болуы керек:
- екі немесе одан да көп материктің және екі негізгі нарығында (Қытай, Еуропа, Үндістан, Жапония, Корея, Латын Америкасы немесе АҚШ сияқты) ресми түрде ұсынылуы;
- жылдық өндіріс көлемі 10 000 данадан кем болмауы;
- бағасы люкс сегментінен төмен болуы қажет.
Жүлделер бірнеше негізгі номинация бойынша табысталады: «Жылдың үздік көлігі», «Қалалық автомобиль», «Люкстік автомобиль», «Спорткар», «Электромобиль», «Үздік дизайн» және «Авто саласындағы жыл адамы».
2025 жылғы World Car Awards жеңімпаздары
Тізім мынадай:
- Жылдың үздік көлігі — Kia EV3
- Жылдың электромобилі — Hyundai Inster
- Люкс автомобиль — Volvo EX90
- Қалалық автомобиль — BYD Seagull/Dolphin Mini
- Спорттық автомобиль — Porsche 911 Carrera GTS
- Үздік дизайн — Volkswagen ID. Buzz
- Жыл адамы — BYD вице-президенті Стелла Ли
Нарықтағы жаһандық тенденциялар
Соңғы жылдары World Car of the Year жүлдесі электромобильдерді жиі атап өтуде. Бұл — әлемдік автоөнеркәсіптің экология мен көміртексіз болашаққа бағыт алғанын көрсетеді. Оңтүстік Кореяда шығарылатын брендтің қатарынан екінші жыл жеңіске жетуі — оның қолжетімді әрі технологиялық электромобильдер сегментінде мықты позицияға ие екенін айғақтайды. EV3 — шағын электрлі кроссовер, заманауи дизайны, жүргізушіге көмекші жүйелері және тиімді бағасы тұрғысынан өте тартымды.
BYD компаниясының «Қалалық автомобиль» номинациясында жеңіске жетуі қытай автосаласының жаһандық ықпалын көрсетеді. Қытай автокөліктері халықаралық нарықтарға белсенді еніп, жапон, еуропалық және корейлік брендтерге бәсекелес бола алатынын дәлелдеуде.
«Үздік дизайн» номинациясындағы финалистердің алуан түрлілігі қазіргі автодизайн әлемінің әртүрлі бағытта дамып жатқанын аңғартады — ретрофутуристік Volkswagen ID. Buzz, классикалық Toyota Land Cruiser және заманауи Kia EV3 — әрқайсысы өз стилімен ерекшеленеді.
2025 жылғы байқаудың нәтижелері автоөнеркәсіптің басты даму бағыттарын айқын көрсетті: электрлендіру, экология, ыңғайлылық, технологиялық шешімдер және пайдаланушы тәжірибесіне назар. Бүгінгі таңда тек қымбат әрі қуатты темір тұлпарлар ғана емес, бағасы тиімді, «ақылды» және күнделікті қолдануға ыңғайлы электромобильдер де жеңіске жетуде. Автокөлік әлемінің болашағы осы бағытта дамып жатыр.
Бұған дейін авто нарықтағы экологиялық таза көліктері туралы жазған едік. Оның атықшылықтары мен кемшіліктерін сараладық. Электромобильдер мен гибридтер туралы толығырақ ақпарат бердік.
