Әлеуметтік желілерде Талдықорғанда қайырымдылық ұйымдары кейпінде заңсыз медреселер жұмыс істеуі мүмкін екендігі туралы ақпарат тарап жатыр, деп хабарлайды Kazinform.
Желідегі үндеу авторының айтуынша, оларда тиісті лицензиясыз және Қазақстан мұсылмандары діни басқармасының (ҚМДБ) жүйесінен тыс балалар мен жастарға діни білім беру жүзеге асырылады.
Жетісу облысының полиция департаменті бұл ақпараттың қазірдің өзінде тексеріліп жатқанын хабарлады.
«Қазіргі уақытта полиция қызметкерлері уәкілетті мемлекеттік органдармен бірлесіп тексеру жүргізуде», – деп хабарлады ведомстводан.
Полиция өзге мәліметтерді нақтыламады.
Еске сала кетейік, бұған дейін Қостанайдың бас имамы мас күйінде көлік тізгіндегені үшін 15 тәулікке қамалып, 7 жылға көлік жүргізу құқығынан айырылған еді.
