«Астана» баскетбол клубы мемлекеттік қаржыландыру көлемінен айырылуы мүмкін. Бұл туралы Туризм және спорт министрлігі мәлімдеді.
42 жеңіліс және соңғы орын
Спорт және дене шынықтыру істері комитеті соңғы жылдары клубтың нәтижелері нашарлап кеткенін атап өтті. ВТБ Бірыңғай лигасының өткен маусымында команда 44 матчтың тек екеуінде жеңіске жетіп, соңғы 12-орынды иеленді. Жеңіліс көрсеткіші 95%-дан асып, клуб тарихындағы ең нашар антирекорд болды. Сонымен қатар, «Астана» Қазақстан кубогын да, Ұлттық лига чемпиондығын да жеңіп ала алмады.
Басымдық – жас мамандар мен резервте
Заңнамаға сәйкес, бұдан былай бюджет есебінен легионерлерді қаржыландыру тоқтатылады.
«Қалыптасқан жағдайда отандық баскетболды дамыту тәсілдерін қайта қарау мүмкіндігі қарастырылуда. Жастар командасын дамыту, спорттық резервті дайындау және балалар-жасөспірімдер спортын қолдау басымдыққа айналады», – деп хабарлады ведомство.
Қазақстан Ұлттық баскетбол федерациясы қаржыландырудың қысқартылуын қолдап, жергілікті жас ойыншыларды дамытуға ниетті екенін білдірді.
Еске салсақ, мамыр айында «Астана» Батыс Азия суперлигасында (WASL) барлық ойында ұтылған соң, ВТБ Бірыңғай лигасының келесі маусымына қатысудан бас тартқан еді.
