Елдің әсем жерлерін әлемге танытып жүрген тревел-блогер Дастан Мұхамедрахымның шақыруымен келген блогер Joe Hattab-тың youtube-те Қазақстан туралы деректі фильмі шықты, деп хабарлайды Kursiv.Media.
36 минуттық ролик «Әлемнің ең бағаланбаған елі» деп аталады. Видеоны қазақша тамашалағысы келгендер үшін қазақша аудиотрек те қосылған.
Joe Hattab сапары Алматы қаласы мен облысының көрікті жерлерінен басталады.
Қазақтың саятшылық өнерімен танысып, қыран құстың қоян алғанын көреді. Асы жайлауында қолына уық ұстап, киіз үй тігіде, алтыбақан тебеді, ұлттық ойындарды ойнап, ұлттық тағамнан дәм татады.
Көлсай көлдерінің сұлулығын тамашалап, көл астының өмірін көрсетеді.
Маңғыстауға барып, қарт Каспидің сұлулығын, Үстүрт жазығы мен Бозжыраның ғажап табиғатын көзбен көріп, камерасына әдемі кадрларды таспалаған.
Артынша Астананың заманауи архитектурасы мен елдің ЖИ саласында жасап жатқан жұмыстарымен танысады.
Сапар соңын Байқоңырдағы ғарыш айлағын көрумен аяқтайды.
Видео барысында Joe Hattab қазақтың тарихы, мәдениеті, экономикасы хақында ақпарат беріп, ел туралы әңгімелеп отырады.
Видео жүктелген 17 сағаттың ішінде 1 жарым миллионнан астам қаралым жинап үлгерді. Joe Hattab-тың youtube арнасында 21 млн-ға жуық жазылушы бар. Оның Қытай, Мысыр туралы видеолары 50 млн-ға жуық қаралым жинаған.
