Жаңа iPhone-ға қомақты ақша жұмсамай-ақ, қолыңыздағы смартфонды жаңартып алуға болады. Егер қолыңыздағы смартфон әлі де қалыпты жұмыс істеп тұрса, оны ауыстыруға асықпаңыз. Мамандардың айтуынша, бірнеше қарапайым қадам ескі iPhone-ның жұмысын жақсартып, пайдалану мерзімін ұзартуға көмектеседі. Бұл туралы Kursiv.media Finratings.kz басылымына сілтеме жасап хабарлайды.
1. Аккумуляторын ауыстырыңыз
Егер телефонды күніне бірнеше рет қуаттауға тура келсе немесе батареясы тез отырып қалса, алдымен аккумулятордың жағдайын тексеріп көріңіз.
Ол үшін «Баптаулар» → «Аккумулятор» → «Аккумулятор күйі» бөліміне кіріңіз. Осы жерден батареяның максималды сыйымдылығын көруге болады.
Егер бұл көрсеткіш айтарлықтай төмендесе, аккумуляторды ауыстыру телефонның тез қуатсыздану мәселесін шешуі мүмкін. Apple батареяның максималды сыйымдылығы едәуір төмендеген жағдайда, соның ішінде 80%-ға дейін түскенде, аккумуляторды ауыстыруды ұсынады.
Бұл үшін телефонды түгел ауыстыру міндетті емес. Жаңа аккумулятордың бағасы iPhone моделіне және сервис орталығына байланысты өзгереді. Сондықтан жөндеу алдында Қазақстандағы нақты бағасын біліп алған жөн.
2. Жадын босатыңыз
Кейде ескі iPhone-ның баяу жұмыс істеуіне жадтың толып қалуы себеп болуы мүмкін.
Мұны «Реттеулер» → «Жалпы» → «iPhone сақтау орны» бөлімі арқылы тексеруге болады. Мұнда телефон жадында ең көп орын алып тұрған файлдар мен қосымшалар көрсетіледі.
Көбіне жадты бұрыннан қажет емес фото мен видеолар, сондай-ақ сирек қолданылатын қосымшалар толтырып тұрады.
Егер қарапайым тазалау көмектеспесе, iPhone-ды толықтай бастапқы күйіне қайтаруға болады. Бірақ бұған дейін фото, контактілер және басқа да маңызды деректерді міндетті түрде резервтік көшірмеге сақтап алыңыз.
Содан кейін смартфонды қайта баптауға немесе сақталған резервтік көшірмеден деректерді қалпына келтіруге болады.
3. Сыртқы көрінісін өзгертіңіз
Кейде жаңа iPhone алғыңыз келуінің себебі – смартфонның өзінен жалығып кетуіңіз болуы мүмкін. Телефон бұрынғыдай жақсы істейді, бірақ бірнеше жылдан бері бір дизайнға қарап жүрген соң, өзгеріс жасағыңыз келеді.
Мұндай жағдайда смартфонның сыртқы көрінісін өзгертіп көруге болады. Түсі немесе дизайны бөлек жаңа қаптама таныс iPhone-ды мүлде басқаша етіп көрсетуі мүмкін. Қазіргі модельдердің түсіне ұқсас реңкті таңдауға немесе керісінше, мүлде басқа түсті байқап көруге болады.
Бұл – смартфонның өзі көңілден шығып тұрса, оны жаңартқандай әсер алудың әлдеқайда арзан тәсілі. Яғни құрылғының өзі өзгермейді, тек сыртқы көрінісі жаңарады. Ал телефон бұрынғыдай қажетті функциялардың бәрін орындай береді.
Ал iPhone-ды қашан ауыстырған жөн
Егер аккумуляторды ауыстырғаннан кейін де телефонның қуаты тез таусылса, жад үнемі жетіспесе немесе экраны мен басқа да бөлшектерінде ақау пайда болса, оны жөндеуге жұмсалған шығын өзін ақтамауы мүмкін.
Ал смартфон сізге әлі де қолайлы болса, қажетті жаңартуларды алып, күнделікті керек функцияларды қалыпты орындап тұрса, алдымен жөндеу мен қызмет көрсетуге қанша ақша кететінін есептеп көрген жөн.
4. Ескі iPhone-ды Trade-in арқылы ауыстыруға болады
Егер жаңа iPhone алғыңыз келсе, бірақ оның толық құнын төлеу қиын болса, Trade-in бағдарламасын қарастыруға болады. Бұл жағдайда ескі смартфоныңыз бағаланып, оның құны жаңа телефонның бағасынан шегеріледі.
Мысалы, дүкен қазіргі iPhone-ыңызды 200 мың теңгеге бағаласа, бұл сома жаңа смартфонның құнынан алынып тасталады. Қалған соманы өзіңіз төлейсіз. Кейбір дүкендерде қалған ақшаны бөліп төлеуге немесе несие рәсімдеуге де болады.
Ескі iPhone үшін қанша ақша берілетіні оның моделіне, шыққан жылына және жалпы жағдайына байланысты. Бағалауға экран мен корпустың күйі, аккумулятордың жағдайы және құрылғыдағы негізгі функциялардың дұрыс жұмыс істеуі де әсер етеді.
Смартфонды Trade-in-ге өткізбес бұрын бірнеше ұсынысты салыстырып көрген жөн. Кейде ескі iPhone-ды өзіңіз сатқан тиімдірек болуы мүмкін. Бірақ бұл жағдайда сатып алушы іздеп, келісім жасауға уақыт жұмсауға тура келеді.
Айта кетейік, 18 қыркүйектен бастап Sulpak және Technodom дүкендер желісі iPhone 18 Pro және Pro Max смартфондарына алдын ала тапсырыс қабылдауды бастады. Базалық 256 ГБ жады бар iPhone 18 Pro бағасы 849 990 теңгені құраса, Pro Max нұсқасы 909 990 теңгеге бағаланып отыр.
