Қазақстанның үш мегаполисінде инвестиция азайды

Жарияланды 17 Қараша 2026 16:48

Нұрсұлтан Ерболатұлы

Нұрсұлтан Ерболатұлы

Business news бөлімінің аға журналисі nursultankaseke@gmail.com
фото: NY

Қазақстанның ірі қалаларында қазан айында негізгі капиталға салынған инвестиция былтырғы деңгейден төмендеді. Ең үлкен құлдырау Шымкентте тіркелді: инвестицияның нақты көлемі 42,2% қысқарған. Алматыда төмендеу 13,5%, Астанада 10,6% болды. Соның салдарынан үш мегаполисте де он айлық өсім баяулады. Ұлттық статистика бюросы қаңтар–қазан қорытындысын жариялады.

Өңірлердегі инвестиция: өсім мен төмендеу

2026 жылғы қаңтар–қазан · 2025 жылғы сәйкес кезеңмен салыстырғанда, нақты көлемнің өзгерісі

Қазақстан бойынша
18 321,4 млрд теңге
+4,9%
Ұлытау
+74,4%
Жамбыл
+29,0%
Павлодар
+13,4%
Түркістан
+13,0%
Алматы облысы
+11,4%
Шығыс Қазақстан
+10,6%
Ақтөбе
+8,2%
Маңғыстау
+4,5%
Солтүстік Қазақстан
+4,1%
Астана қаласы
+2,8%
Қостанай
+2,7%
Атырау
+2,4%
Батыс Қазақстан
+1,9%
Қызылорда
+1,9%
Алматы қаласы
+1,1%
Абай
+0,4%
Шымкент қаласы
+0,1%
Ақмола
-3,4%
Қарағанды
-8,7%
Жетісу
-31,7%

Дереккөз: ҚР Ұлттық статистика бюросы

Шымкентте өсім тоқтауға жақын

Шымкентте қазан айындағы инвестиция көлемі қыркүйекпен салыстырғанда 34,6%, ал былтырғы қазаннан 42,2% азайды. Бұл республикалық маңызы бар үш қала арасындағы ең үлкен төмендеу.

Қаңтар–қыркүйекте қаладағы инвестицияның нақты өсімі 7,4% болған еді. Қазан қорытындысы қосылғаннан кейін он айлық өсім небәрі 0,1% деңгейінде қалды. Осы кезеңде Шымкентте негізгі капиталға 633,4 млрд теңге салынған.

Алматы мен Астанада да қарқын бәсеңдеді

Алматыда қазан айындағы инвестиция былтырғы сәйкес аймен салыстырғанда 13,5% төмендеді. Дегенмен қыркүйекке қарағанда 3,2% өскен. Яғни қаладағы төмендеу жылдық салыстыруда байқалып отыр.

Он айда Алматы экономикасына 1 896 млрд теңге инвестиция салынды. Салыстырмалы бағамен өсім 1,1% болды. Қаңтар–қыркүйекте бұл көрсеткіш 3,1% еді. Осылайша бір айда жинақталған өсім қарқыны 2 п.т. баяулады.

Астанада қазан айындағы инвестиция қыркүйектен 29,1%, былтырғы қазаннан 10,6% азайды. Соның әсерінен қаңтар–қазандағы өсім 2,8%-ға дейін төмендеді. Тоғыз айдың қорытындысында өсім 5,2% болған. Он айда елордаға барлығы 2 137,8 млрд теңге инвестиция салынған.

Ел бойынша да инвестиция өсімі баяулады

Ірі қалалардағы жағдай жалпыұлттық үрдіспен сәйкес келеді. Қазақстанда қазан айындағы инвестицияның нақты көлемі былтырғы қазанмен салыстырғанда 8,1% төмендеді. Ал қаңтар–қазанда негізгі капиталға 18 321,4 млрд теңге салынғанымен, нақты өсім 4,9% болды. Тоғыз айда бұл көрсеткіш 7%-ды құраған.

Өңірлер арасында айырмашылық айқын: он айда Ұлытауда инвестиция 74,4%, Жамбыл облысында 29% өскен. Ал Жетісуда 31,7%, Қарағанды облысында 8,7%, Ақмола облысында 3,4% азайған.

Үш мегаполистегі инвестицияның қысқаруы әзірге қазан айының жылдық көрсеткішіне қатысты. Қаңтар–қазан қорытындысында Астана, Алматы және Шымкенттің үшеуінде де өсім сақталған, бірақ оның қарқыны бәсеңдеген.

Сондай-ақ оқыңыз