Qarmet зауытын сатып алуға қатысқан мемлекеттік қордың пайдасы үш есе қысқарды
Qarmet (бұрынғы ArcelorMittal Temirtau) активтері бизнесмен және Allur Auto компаниясының иесі Андрей Лаврентьевке сатылғанға дейін берілген Qazaqstan Investment Corporation (QIC) мемлекеттік қорының таза пайдасы 2,7 есеге, 3,8 миллиард теңгеге дейін қысқарды. Бұл туралы Қазақстан қор биржасының (KASE) сайтында жарияланған қордың қаржылық есебінде жазылған.
Таза пайда мөлшері
Таза пайда шетел валютасымен операциялар бойынша шығындардың ұлғаюына байланысты төмендеді. 2022 жылдың аяғында 728,8 млн теңге кіріс түсті. Ал 2023 жылдың соңында – 88 млн теңге шығын тіркелді. Негізгі қызметтен түскен кіріс 5,6 млрд теңгеге азайып, 11,1 млрд теңгеге жетті.
Клиенттерге берілген несие көлемі үш есеге өсіп, 15,9 млрд теңгені құрады. 2023 жылы Қор жылдық 8%-дан 12,06%-ға дейінгі сыйақы мөлшерлемесі және 2024–2030 жылдар аралығында өтеу мерзімімен 12,9 млрд теңгеге несие берді.
Активтер 13,6%-ға өсіп, 267,3 млрд теңгеге, міндеттемелер 54,2 млрд теңгеден 53,7 млрд теңгеге дейін азайды. Жеке капитал 17,3%-ға өсіп, 213,5 млрд теңгені құрады. Компания қаражаттары мен олардың баламалары өсіп, 68,9 млрд теңгені құрады.
Дивиденд көлемі қандай?
2023 жылы компания дивиденд ретінде 1,7 млрд теңге немесе бір акцияға 33,14 теңге төледі. Бұл ретте бөлуге бөлінген қаражат көлемі 65,8 млрд теңгені құрады. Қызметкерлерге төленетін сыйақыларды, сондай-ақ салықтар мен жалақыны қамтитын шығындар бір жыл бұрынғы 1,4 млрд теңгемен салыстырғанда 1,6 млрд теңгені құрады.
ArcelorMittal-дан Qarmet-ке дейін
Өткен жылы Үндістандық миллиардер Лакшми Митталға тиесілі ArcelorMittal Индустрия және құрылыс министрлігінің араласуымен қазақстандық активтерін QIC компаниясына берді. Желтоқсан айының басында ArcelorMittal Temirtau бойынша мәміле аяқталды. Үкімет зауытты 286 миллион долларға сатып алды. Жаңа инвестор қазақстандық кәсіпкер Андрей Лаврентьев болатын.
Мемлекет басшысы қазан айының соңында АМТ көмір шахталарының бірінде орын алған кезекті апаттан кейін «АрселорМиттал Теміртау» компаниясымен инвестициялық ынтымақтастықты тоқтатуды тапсырды. Бұл зардап шеккендердің саны бойынша зауыт тарихындағы ең ірі апат болды. Шахтадағы өрт пен одан кейінгі жарылыс салдарынан 46 кенші қаза тапты.
Естеріңізге саламыз, 2022 жылы қараша айының басында «АрселорМиттал Теміртау» шахталарының бірінде газ апаты болып, салдарынан 5 адам қаза тапқан еді.
Аталған компанияның шахталарында 2006 жылдан бері 20-дан аса апат болған.
