Қазақстандық Айару Алтынбек Перу астанасы – Лимада 13 жасқа дейінгі оқушылар арасында классикалық шахматтан өткен әлем чемпионатында алтын медаль жеңіп алды.
«Айарудың мерзімінен бұрын, мәреге бір раунд қалғанда, бірінші орын алатыны мәлім болды. Бірақ рейтинг үздігі (1868) босаңсуға жол бермей, қайтадан жеңіске жетті. Ол тоғыз ойынды 8½ ұпаймен аяқтап, қарсыласын бір жарым ұпайға жеңді», – делінген ҚШФ есебінде.
9 жасқа дейінгі жас санатында қостанайлық студент Иман Нәбиев (1636, рейтингте №8) қола жүлдені иеленді. Иман да жеткілікті деңгейде 7½ ұпай жинады, бірақ қосымша көрсеткіштер төмен болуы себепті жеңіс тұғырына көтеріле алмады.
«Дайындық пен шеберлік деңгейі жоғары екенін тағы бір мәрте дәлелдеген жас қазақ шахматшыларының жетістігін шын жүректен мақтан тұтамын. Жаттықтырушылар мен ата-аналардың қажырлы еңбегінің, сондай-ақ оқушылардың қайсар мінезі мен табандылығының арқасында команда тамаша нәтиже көрсетті. Осындай жоғары деңгейдегі жеңістер қазақ шахматының болашағына деген сенімді нығайтады және дарындарды қолдау бойынша таңдаған бағытымыздың дұрыстығын растайды», – деді KazChess/Қазақ шахмат федерациясының президенті Тимур Турлов.
Классикалық шахматтан өткен 2024 жылғы әлем чемпионатында оқушылар швейцариялық жүйе (бүкіл ойынға 90 минут және әрбір орындалған жүріс үшін 30 секунд) бойынша сынға түсті. 7-ден 17 жас аралығындағы жас санаттары бойынша ұлдар және қыздар тоғыз раунд бақ сынады. Чемпионатқа Перу, Эквадор, Боливия, Мексика, Қазақстан, Колумбия және Моңғолияны қоса алғанда, жалпы 26 елден барлығы 1174 жас шахматшы қатысты.
Мамыр айында Қытайда Шанхай Ынтымақтастық Ұйымы хатшылығының ғимаратында ұйымға қатысушы елдердің дипломаттары, ШЫҰ-ның бақылаушылары мен диалогтық серіктестері арасында шахматтан турнир өтті. Бұл сайыста Қазақстан құрамасы жеңіп шықты.
