ЕуроОдақ санкциясына іліккен қазақстандық компаниялар әлі Ресейге тауар тасымалдап жүр ме
ЕуроОдақ санкциясына ілікккен қазақстандық компаниялар қазіргі кезде экспортпен айналыспайды. Олар жұмысын тоқтатпаған. Бірақ қызмет бағытын ауыстырған. Бұл туралы Мәжіліс кулуарында Сауда және интеграция министрі Арман Шаққалиев айтты.
ЕО 25 ақпанда Ресейге қарсы кезекті санциялар пакетін жариялаған. Бұл – Ресей Украинаға басып кіргелі салынған санциялардың 16-легі. Дәл осы тізімге Ресейге машина жасау саласындағы түрлі станоктар жеткізетін қазақстандық екі компания іліккен. Министр қазіргі кезде бұл компаниялар экспортпен айналыспайды деп тұжырымдайды.
«Бұл компаниялар бұған дейін де АҚШ санциясына іліккен. Мемлекеттік кірістер комитетінің дерегі бойынша, олар қазір экспортпен айналыспайды. Жұмысын тоқтатқан жоқ, бірақ қызмет бағытын ауыстырған», – деді министр.
Министр қандай тауар немесе компания санкцияға ілігетінін алдын ала білу мүмкін емес дейді. Алдын ала ешқандай тізім жіберілмейді. Жоғарыдағы қос компания мысалында, олар Ресейге сатып жүрген тауарлар санкция тізіміне етіп, өздері санкцияға ұшыраған.
«Бұл ретте кім санцияға ілігетіні біліп отырып, ешқандай шара қолданбады деген сөз емес. Халықаралық келісімдерге сай міндеттемелеріміз бар. Сол міндеттемедерді қатаң сақтап отырмыз», – деді Шаққалиев.
ЕО 48 жеке тұлға мен 35 ұйымды санкция тізіміне енгізді Осы тізіміге қазақстандық MetallStan LLP және Kazstanex компаниясы енді. Бұл компанияларды ЕО «Ресейдің әскери-өнеркәсіптік кешенін қолдап жүр» деп айыптап отыр.
Қос компания туралы не белгілі
Kazstanex компаниясы 2024 жылдың қазанында АҚШ пен Ұлыбритания санкциясына іліккен еді. Ол кезде де компанияға шетел зауыттарынан Ресейге қондырғы жеткізеді деген айып тағылған.
Egov.kz мәліметі бойынша компания 2014 жылы тіркелген. Оның негізін қалаушы және бірінші директоры – Василий Абрамов.
MetallStan компаниясы 2012 жылы тіркелген. Түрлі тауар сатумен айналысады. Алматыда орналасқан компанияның директоры Сергей Пермикин.
