Алматы қаласының әкімі Дархан Сатыбалды жұмыс сапары барысында қаладағы коммуналдық инфрақұрылым нысандарын аралап, инженерлік желілердің құрылысы мен қайта жаңғырту жұмыстарының барысымен танысты.
«Достық» шағынауданындағы су және кәріз желілері
Әуезов ауданындағы «Достық» шағынауданында ауызсу және кәріз жүйелерін салу жобасы жасалынып жатыр. Жалпы ұзындығы 15,7 шақырым болатын инженерлік желілер 800 үйді немесе 3,5 мыңға жуық тұрғынды қамтиды. Бүгінгі күнге дейін жұмыстың 75%-ы орындалған.
«Жұмысты қысты күтпей, қысқа мерзімде аяқтау қажет. Ең бастысы – қауіпсіздік, сапа және уақыт. Біз қазан айының соңына дейін бітіруді тапсырдық», – деді қала әкімі.
Алмалы ауданындағы жылу желілері
Әкім Жамбыл – Жароков – Айманов – Қабанбай батыр көшелерінің аумағында жүргізіліп жатқан жылу желілерінің қайта жаңғырту жұмыстарын да тексерді. Ұзындығы 583 метр болатын апатты жағдайда тұрған желілер толық ауыстырылуда. Жоба 2025 жылдың қыркүйегінде аяқталады. Дархан Сатыбалды жұмыстардан кейін барлық аумақты қалпына келтіру қажеттігін ескертті.
Бостандық ауданындағы су құбыры
Мыңбаев көшесінде (Жароковтан Түркебаевқа дейін) су құбырының реконструкциясы жүргізілуде. Бірінші кезеңде 1 083 метр құбыр ауыстырылуда, қазіргі таңда 124 метрі тартылды. Жоба 2025 жылдың қарашасында бітуі тиіс.
Екінші кезеңде ұзындығы 1 790 метр болатын құбыр ауыстырылып, 33 құдық орнатылады. Бүгінде 1 шақырым құбыр төселіп, 14 құдық орнатылған. Жоба 2025 жылдың желтоқсанында толық аяқталмақ. Бұл Бостандық ауданы тұрғындарын үздіксіз ауызсумен қамтуға мүмкіндік береді.
Сапардың соңында қала әкімі Бостандық ауданындағы ТК 4-2 жылу торабы мен «Алмагүл-Оңтүстік» сорғы станциясын байланыстыратын 1,2 шақырымдық жылу желісін қайта жаңғырту жұмыстарын көрді. 1976 жылдан бері пайдаланылып келе жатқан желілер толық тозған деп танылған. Олар 150-ден астам көпқабатты үйді және әлеуметтік нысандарды жылумен қамтамасыз етеді.
Еске сала кетейік, Kursiv Media Алматы қаласында жөнделіп жатқан қала көшелердін жағдайын аралып қайтқан еді.
