Қазақтың біртуар ғалымы әрі ағартушысы Шоқан Уәлиханов туралы жаңа деректі көркем фильм жыл аяғына дейін жарық көреді. Жоба продюсері Майя Бекбаева осылай дейді.
«Жаңсақ айтқым келмейді, бірақ жыл аяғына дейін жарыққа шығады деп ойлаймын», – деп жауап берді Бекбаева әлеуметтік желідегілердің сауалына.
Фильмді түсіру өткен аптаның аяғында аяқталған. Түсіру тобы Өзбекстандағы Бұхара қаласында, Астана іргесіндегі Қоянды және Тайтөбе ауылдарында жұмыс істеген.
Жобаға Меруерт Өтекешова, Бақтияр Қожа сынды танымал актерлер қатысты. Ал Шоқан рөліне 28 жастағы Ерлан Құлмурзин бекітілді. Алайда осындай шешімді әлеуметтік желідегілер сынап, оны «Шоқанның атқосшысы» деп атады. Артынша продюсер Бекбаева басты рөлге сай актерді ұзақ іздегенін айтып, жұмысын бағалауға кеңес берді.
Шоқан Шыңғысұлы Уәлиханов (1835–1865) – ұлы қазақ ғалымы, зерттеуші, саяхатшы, тарихшы және этнограф. Ірі тұлғаның өмірбаяны туралы фильмдер 1984 және 1957 жылдары түсірілген.
