Kursiv.Media зерттеуінше, қазақстандықтар ең жоғары жалақыны 35-45 жасында алады. Осы жаста қызметкер тәжірибе жинап, еңбек нарығындағы құны артады. Бірақ медианалық жалақыға қарасақ, қызық айырмашылық бар: 25-35 жастағылар да өте мықты позицияда тұр.
Ең жоғары орташа жалақы – 35-45 жаста
Еңбек ресурстарын дамыту орталығының дерегінше, 2025 жылы 35-45 жас аралығындағы қызметкерлердің орташа айлық жалақысы 421 311 теңге болған. Бұл – қарастырылған жас топтарының ішіндегі ең жоғары көрсеткіш.
Нәтижесі еңбек нарығындағы тәжірибе мен кәсіби біліктің рөлін көрсетеді. Әдетте осы жастағы мамандарда жұмыс өтілі жеткілікті, басшылық немесе жоғары білікті қызметке өту мүмкіндігі жоғары болады. Сондықтан олардың орташа табысы басқа топтардан жоғары.
Салыстырар болсақ, 2025 жылы 25-35 жастағылардың орташа жалақысы 389 020 теңге болды. 45-55 жас аралығында бұл көрсеткіш 375 398 теңге, ал 55 жастан асқандарда 351 488 теңге деңгейінде қалыптасты.
Жалақы 25 жастан кейін қатты өседі
18-25 жас аралығындағы қызметкерлердің орташа айлығы 2025 жылы 247 772 теңгені құраған. Бұл топтағылар көбіне еңбек жолын енді бастап жатқан жастар болғандықтан, табыс деңгейі төменірек.
Бірақ 25 жастан кейін жалақыда айқын секіріс байқалады. 18-25 жас пен 25-35 жас тобының арасындағы айырмашылық 141 мың теңгеден асады. Бұл кезеңде қызметкерлер тәжірибе жинап, маман ретінде қалыптасады, жалақысы жоғары қызметке ауыса бастайды.
Яғни еңбек нарығында алғашқы табыс өсімі көбіне 25 жастан кейін басталады.
Медианалық жалақы басқа картинаны көрсетеді
Орташа жалақы бойынша 35-45 жас тобы алда болғанымен, медианалық жалақыда 25-35 жастағылар сәл жоғары тұр. 2025 жылы бұл топтың медианалық жалақысы 294 104 теңге болды. Ал 35-45 жастағылардың медианалық жалақысы – 292 406 теңге.
Бұл нені білдіреді? Орташа жалақыны жоғары табыс алатын шағын топ қатты көтеруі мүмкін. Ал медиана көпшілікке жақынырақ көрсеткіш саналады. Сондықтан 25-35 жас аралығындағы қызметкерлер арасында табыс біршама теңірек бөлінген болуы ықтимал.
18-25 жаста медианалық жалақы 193 725 теңге болды. 45-55 жаста – 254 600 теңге, 55 жастан асқандарда – 252 461 теңге.
Нені бақылау керек?
Қазақстанда жалақы жақсы өсетін кезең – 25 жастан кейінгі уақыт. Ең жоғары орташа табыс 35-45 жаста қалыптасады. Ал 45 жастан кейін орташа жалақы біртіндеп төмендей бастайды.
Тағы да оқыңыз: Қазақстандағы курьерлер айына 1,5 млн теңге таба ма?
