К. Бәйсейітова атындағы Қазақ ұлттық өнер университетінің амфитеатрында Ұлттық Домбыра күніне орайластырылған «Даламыздың үнісің сен, домбыра» атты концерт өтті, деп хабарлайды елорда әкімдігі.
Кештің басты қонағы «Дарын» мемлекеттік жастар сыйлығының лауреаты және «Алтын домбыра» ұлттық өнер мектебінің негізін қалаушы Ибрагим Ескендір болды.
Ол мектептің жас домбырашыларымен бірге дәстүрлі күйлер мен халық әндерін орындап, көрермендердің ыстық ықыласына бөленді.
«Домбыра – бұл жай ғана аспап емес. Бұл – халқымыздың тарихы, тілі мен жаны. Мұндай кештер жас ұрпаққа ұлттық мұрамызды қастерлеуге үлкен серпін береді. «Алтын домбыра» мектебінің тәрбиеленушілері мен ұстаздарына, сондай-ақ осы кешке келген барлық тұрғындарға алғысымды білдіремін», – деп атап өтті Сарайшық ауданының әкімі Мақсат Саматұлы.
Бүгін президент Қасым-Жомарт Тоқаев қазақстандықтарды Ұлттық Домбыра күнімен құттықтап, республикадағы әрбір шаңыраққа бейбітшілік, бақыт пен бақ-береке тіледі. Мемлекет басшысының айтуынша, бұл музыкалық аспаптың көмегімен дәуірлер мен ұрпақтар арасындағы сабақтастық сақталып келді, өйткені Домбыра – қуанышта да, сынақтарда да тереңнен үн қатып, халықтың рухы мен бірлігін нығайтатын ұлттың үні.
