Шпагамен семсерлесуден Қазақстан ерлер құрамасы өз тарихында алғаш рет әлем чемпионатының алтынын еншіледі.
Гонконгта өткен жарыстың финалында команда Украина семсерлесушілерімен бақ сынасты. Матч 45:40 есебімен қазақстандық спортшылардың пайдасына аяқталды. Еліміздің намысын Руслан Курбанов, Вадим Шарлаимов, Ерлік Сертай және Кирилл Проходов қорғады.
Чемпионат барысында қазақстандықтар Финляндия (45:39), Өзбекстан (28:27), Дания (45:36) және Мысыр (41:32) құрамаларын жеңді.
Бұған дейін команданың әлем чемпионатындағы ең үздік нәтижесі 2025 жылы Грузияда жеңіп алған қола жүлдесі болатын.
