Степногорск қаласында биыл 22 шақырымнан астам магистральдық жылу желісі жаңартылды. Алдағы жылыту маусымында тұтынушыларды үздіксіз жылумен қамтамасыз ету мақсатында жүргізілді, деп жазады Kursiv Media.
Атап айтқанда, Степногорск жылу электр орталығынан (ЖЭО) қалаға дейінгі учаскелерде диаметрі 800 мм болатын 8,2 шақырым, диаметрі 600 мм болатын 0,7 шақырым және диаметрі 500 мм болатын шамамен 14 шақырым жылу желісі ауыстырылып, қайта жаңғыртылды.
Жұмыстар бюджеттік жобалар және «Энергетикалық және коммуналдық секторларды жаңғырту» ұлттық жобасы аясында «Степногорск Теплотранзит» ЖШС тарапынан жүзеге асырылды.
Диаметрі 800 мм жылу магистралін реконструкциялау жобасы екі жылға жоспарланған. Осыған байланысты жұмыстар келесі жылы да жалғасады.
Энергетика министрлігі хабарлағандай, жаңғырту жұмыстары жылу желілерінің тозуын және жылу шығындарын азайтуға, апаттық жағдайлардың алдын алуға, сондай-ақ тұтынушыларды жылумен тұрақты әрі үздіксіз қамтамасыз етуге бағытталған.
Қазіргі уақытта энергетика министрлігі мемлекеттік энергетикалық қадағалау және бақылау комитетінің Ақмола облысы бойынша департаменті өңірдегі энергетикалық кәсіпорындардың алдағы жылыту маусымына дайындығына инспекциялық бақылау жүргізіп жатыр.
Тағы да оқыңыз: Қазақстандағы 5 жылу электр орталығы қауіпті «қызыл» аймақта тұр
