Құрылтай депутаттары «2027–2029 жылдарға арналған республикалық бюджет туралы» заң жобасын бірінші оқылымда мақұлдады. Құжат макроэкономикалық тұрақтылықты сақтау, әлеуметтік міндеттемелерді орындау және инфрақұрылымды дамытуға бағытталған, деп хабарлайды Kursiv.media.
Бюджет жобасына сәйкес, алдағы үш жылда жалпы ішкі өнімнің орташа жылдық өсімі 5,4% болады деп болжанып отыр. 2027 жылы жылдық инфляция 7,5–9,5% деңгейінде болады деп күтілсе, 2029 жылға қарай оны 6%-ға дейін төмендету жоспарланған.
Сондай-ақ бюджет тапшылығын 2029 жылдың соңына қарай жалпы ішкі өнімнің 0,4%-ына дейін қысқарту көзделген. Меншікті кірістерді 23,4 трлн теңгеге дейін ұлғайту, ал Ұлттық қордан берілетін кепілдендірілген трансферт көлемін біртіндеп 2 трлн теңгеге дейін азайту жоспарланып отыр.
2027 жылы республикалық бюджет кірісі 25,4 трлн теңге көлемінде болжанған. Оның негізгі бөлігі – 19,5 трлн теңгесін салық түсімдері құрайды. Ал республикалық бюджет шығыстары 29 трлн теңге көлемінде жоспарланған.
Шығыстардың үштен бірінен астамы ғылым, білім беру және медицина салаларын қолдауға, яғни адами капиталды дамытуға бағытталады. Бұдан бөлек, өңірлерді қолдау, ел қауіпсіздігін қамтамасыз ету және мемлекеттік борышқа қызмет көрсету шығындары қарастырылған.
Келесі жылы экономиканың нақты секторын дамытуға 3,7 трлн теңге бөлу жоспарланып отыр. Қаражаттың басым бөлігі көлік инфрақұрылымына, ауыл шаруашылығына, өнеркәсіпке, кәсіпкерлікке және цифрлық дамуға жұмсалады. Сондай-ақ автомобиль жолдары мен өткізу пункттерін салу, жоғары жылдамдықты интернетке қолжетімділікті кеңейту, ғарыш саласындағы жобаларды іске асыру және агроөнеркәсіп кешенін қолдау жалғасады.
Заң жобасын талқылау кезінде депутаттар макроэкономикалық болжамдардың дәлдігін арттыру және бюджеттің меншікті кірістерін тұрақты өсіру мәселелерін көтерді. Сонымен қатар Ұлттық қордың тұрақтандыру және жинақтау функцияларын сақтай отырып, трансферттерге тәуелділікті азайту қажеттігін атап өтті.
Тағы да оқыңыз: «Бай көпбалалы отбасылар өз күнін өзі көрсін»: Бектенов әлеуметтік көмекті сынады
