Алматы облысы мен Түркия арасындағы тауар айналымы өткен жылы 231 млн доллар болды. Қазір өңірде түрік капиталының қатысуымен құрылған 147 кәсіпорын және екі тараптың бірлескен 31 кәсіпорны жұмыс істейді, деп хабарлайды Kursiv.media.
Облыс әкімі Шыңғыс Әрінов Түркияның Алматы қаласындағы бас консулы Туба Алан Өзденфедакармен кездесіп, сауда-экономикалық, инвестициялық және білім беру салаларындағы ынтымақтастықты талқылады.
Өңірдегі түрік капиталы қатысқан кәсіпорындар құрылыс материалдарын, сүт және кондитерлік өнімдерді, фармацевтикалық тауарларды, пластмасса бұйымдары мен сусындар өндіреді.
Шыңғыс Әрінов бірлескен өндіріс орындарын ашуға, заманауи технологияларды тартуға және экспортқа бағытталған кәсіпорындарды дамытуға мүдделі екенін айтты.
Кездесуде білім беру саласындағы байланыстар да сөз болды. Соңғы үш жылда Алматы облысындағы колледждің 50 студенті Түркияда тәжірибе жинаған. Бұдан бөлек, 25 өндірістік оқыту шебері тағылымдамадан өтіп, төрт педагог біліктілігін арттырған.
Түркияның бас консулының мәліметінше, Қазақстанда 3 800-ден астам түрік кәсіпорны тіркелген. Олардың жартысынан астамы Алматы қаласы мен облысында орналасқан. Түрік құрылыс компаниялары Қазақстанда жалпы құны 30 млрд доллар болатын 500-ден астам жобаны жүзеге асырған.
Кездесу қорытындысында тараптар екіжақты ынтымақтастықты кеңейтуге және жаңа инвестициялық жобаларды бірлесіп дамытуға уағдаласты.
Тағы да оқыңыз: Қазақстан мен Өзбекстан арасындағы тауар айналымы 10 млрд долларға жеткізілмек
