Құрылтай депутаттары Еуразиялық экономикалық одақ туралы шартқа өзгерістер енгізу туралы хаттаманы ратификациялау жөніндегі заң жобасын екі оқылымда мақұлдады. Құжатты сауда және интеграция министрі Арман Шаққалиев таныстырды, деп хабарлайды Kursiv.media.
Хаттамаға ЕАЭО-ға мүше мемлекеттердің басшылары 2025 жылғы 22 желтоқсанда Мәскеуде қол қойған. Құжат одақ аясындағы құқықтық реттеуді жетілдіруге және заң қолдану тәжірибесінде анықталған олқылықтарды жоюға бағытталған.
«Енгізілетін өзгерістер қайталанатын ережелерді жоюға, қолданыстағы тетіктерді нақтылауға және одақ аясындағы жекелеген рәсімдердің ашықтығын арттыруға бағытталған», – деді Арман Шаққалиев.
Заң жобасында мемлекеттік сатып алу саласындағы банктік кепілдіктерді өзара тану қарастырылған. Бұл қазақстандық кәсіпкерлерге отандық банктердің кепілдігі арқылы ЕАЭО-ға мүше басқа мемлекеттердің мемлекеттік сатып алу нарықтарына қатысуға мүмкіндік береді.
«Бұл отандық кәсіпкерлерге Қазақстанның банк кепілдігі болған жағдайда, одаққа мүше мемлекеттердің мемлекеттік сатып алу нарықтарына шығуға мүмкіндік береді», – деді министр.
Сонымен қатар құжатта бәсекелестік саласындағы шешімдерді орындау тәртібін нақтылау және мәжбүрлеп орындату тетіктерін реттеу көзделген.
Министрдің айтуынша, хаттаманы ратификациялау республикалық бюджеттен қосымша шығынды талап етпейді.
Депутаттар заң жобасын екі оқылымда мақұлдады.
Тағы да оқыңыз: Шетелден тауарды қалай баж салығынсыз әкелуге болады
